Etyi pakala katutu, Nambukondonosole alingi otyilolo tyimwe otyinene tyoolu. Etyipake pohika patiwa o Ndula, aihana ovanthu ovanyingi. Na Sandalake na Mesake na Ambendeneku navo eveihana, opo vafende otyilolo otyo. Ati: ‘Tyina mwameivi otyiimbo, amuho ikilei konongolo komutwe wotyilolo! Omunthu wahamaikila konongolo mayumbwa mofolono yotupia.’ Okuti ova Hembeleu ava vetatu mavafende otyilolo otyo, ine mavafende vala ku Siovaa?

Ohamba aipopila vokuhika vahike otyiimbo. Etyi ovanthu aveho vetyiiva, avaikila konongolo okufenda otyilolo, mahi Sandalake na Mesake na Ambendeneku avehetyifende. Etyi vamwe vetyimona, avakapopila Ohamba okuti: ‘Ova Hembeleu vetatu vaanya okufenda otyilolo tyove.’ Nambukondonosole atumu vakapolwe eveti: ‘Mandyipolila vokuhika vahike otyiimbo, nga mwetyiiva fendei kotyilolo. Ine kamutyifende, mandyimuyumbu mofolono yotupia. Petupu huku nawike metyivili okumuyovola.’ Ngwe avati: ‘Onthwe kamatufende kotyilolo. Huku yetu metuyovola. Inkha Huku yetu ketuyovola, no ngootyo hamba, onthwe kamatufende otyilolo.’

Nambukondonosole anumana unene. Atolela ovaundapi vae okuti: ‘Yakesei ofolono ovikando epandu-vali aitokota vali tyipona etyi itokauta-le!’ Atumu ovakwa-vita eveti: ‘Kutei ovalume ava, amuveyumbu mofolono yotupia!’ Ofolono ankho yatokota unene. Etyi ovakwa-vita vokwevetwala  vehika ponthele yofolono, avavauka nomutemo avankhi. Ova Hembeleu ovo vetatu avatokela motupia. Mahi etyi Nambukondonosole avendamena mofolono, amono ovalume vekwana vekahi nokwenda-enda. Atumphuluka apopila ovaundapi vae ati: ‘Katwayumbile-mo vala ovalume vetatu? Ame ndyiete vekwana, mahi umwe welifwa noandyu!’

Nambukondonosole afwene pofolono ati: ‘Endywei tundei-mo vafendi va Huku Omukulami!’ Ovanthu avahuvu etyi vamona Sandalake na Mesake na Ambendeneku valupuka mofolono yotupia tyahapile. Olutu lwavo nonohuki mbavo novikutu viavo kaviapile, tupu ankho kavanikile omwihi.

Nambukondonosole ati: ‘Huku ya Sandalake na Mesake na Ambendeneku, omunene. Watuma oandyu yae iveyovole. Kutupu vali huku omukwavo welifwa nae.’

Okuti noove wahanda okulinga ngova Hembeleu ovo vetatu ofende umwe vala Siovaa, naapa ovipuka vialema?