Etyi Sesusi amana okukoya ovatumwa 12, tyina akati ñgaa ovanthu ovanyingi vekahi nokumukevelela. Vatunda ko Ngalileya noko Sundeya noko Tilu noko Sindone noko Silia nahimba lina o Solondau. Pali ovavei novokumoneswa ononkhumbi novilulu. Sesusi evehakula aveho. Pahe apumphama evelongesa. Evepopila etyi noonthwe tuna okulinga ine twahanda okukala omapanga a Huku. Tuna okunoñgonoka okuti twesukisa okukwateswako na Siovaa, nokumuhumba. Mahi katyitavela okuti tuhole Huku otyo tuyele vakwetu. Tuna okulinga nawa ovanthu aveho novokutuyele.

Sesusi ati: ‘Mwahahumbei vala omapanga enyi. Tupu muna okuhumba onondyale mbenyi, evelei ovanthu aveho tyahasi-mo. Ine pena umwe wekunumanena enda-ko kemwiite otyiponyo. Etyi wahanda vakwenyi vekulinge noove otyo uvelinga.’

 Sesusi tupu wapopile etyi tyayemba konombongo, nokomalumono. Watile: ‘Tyesukisa vali okukala epanga lya Siovaa, tyipona okukala nonombongo ononyingi. Onombongo mbove upondola okumbuvakwa mahi oupanga wove na Siovaa kuuvakwa. Mwahalingei otyiho neetyi mamuli, neetyi mamunu ine neetyi mamuvale. Talelei koviila. Huku apeho uvipa etyi viesukisa. Otyiho katyiyawisa kononthiki mbomwenyo. Mwahalimbweiko okuti Siovaa wii etyi mwesukisa.’

Ovanthu vana nkhele vali kaveneive omunthu upopia ovipuka ngeevi Sesusi apopile. Ononkhalamutwe mbonongeleya mbavo ankho kavevelongesa ovipuka ovio. Omokonda yatyi Sesusi ankho alongesila nawa? Omokonda atyiho ankho alongesa tyitunda ku Siovaa.