Ova Faliseu ankho veyele Sesusi, vahandele okumukwata. Avapopi okuti kapondola okuhakula ovanthu Motyasapalo. Nthiki imwe Motyasapalo, Sesusi avasi omulume umwe wahamono-po wiita osimola metapalo. Apopila ovalongwa vae okuti: ‘Talei oñgeni ononkhono mba Huku mambukwatesako omulume ou.’ Sesusi atili omate pohi, alingi onthata, emuwaeka pomaiho. Emupopila okuti: ‘Enda kelikohe pomaiho metala lyo Silowee.’ Omulume oo alingi etyi apopilwa, okutuka umwe monthiki oyo ahimbika okutala.

Ovanthu otyipuka otyo atyivehuvisa. Avapopi okuti: ‘Omulume ou hayo una tuhole okuvasa apa upumphi otyo aita osimola?’ Omulume apopi okuti: ‘Ame umwe, ame natyitwa-e ndyimumphoki!’ Ovanthu avemupulu okuti: ‘Oñgeni pahe weete-po?’ Etyi omulume apopia etyi alingwa, avemutwala kova Faliseu.

Omulume apopila ova Faliseu okuti: ‘Sesusi wapaka onthata pomaiho ange amphopila ndyikelikohe. Etyi ame nelikoha andyimono-po.’ Ova Faliseu avati: ‘Ine Sesusi wahakula Motyasapalo, ononkhono ombo kambatundile ku Huku.’ Mahi ovanthu ovakwavo avati: ‘Ine ononkhono mbae kambatundile ku Huku, ñgeno ketyivilile okuhakula ovanthu.’

 Ova Faliseu avaihana ovohe yomulume oo, avevepulu okuti: ‘Oñgeni omona wenyi pahe amona-po?’ Ovohe yae vatilile owoma mokonda ova Faliseu vapopia okuti, ovanthu vetavela ku Sesusi mavataatwa mondywo yokufendela. Avati: ‘Katutyii. Mwene mupulei.’ Ova Faliseu avapulu ehimbwe omulume oo atee apopia okuti: ‘Ame nemupopila-le ovipuka aviho. Omokonda yatyi mumphulila ehimbwe?’ Ova Faliseu avanumana avemutahela pondye.

Sesusi avasi omulume oo, emupulu okuti: ‘Ove una onthumbi mu Mesiya?’ Omulume ati: ‘Ndyipondola okukala nonthumbi mwe, mahi pahe omokonda himwii.’ Sesusi emupopila okuti: ‘Ame Mesiya.’ Wetyimona Sesusi ankho omunthu patyi? Sesusi kahakulile vala omulume oo, mahi tupu wemukwatesileko okumuyumba onthumbi.