Swau ankho ulongesa okuti: ‘Makuya umwe omunene vali kwaame.’ Etyi Sesusi ena omanima 30, atundu ko Ngalileya aende Kondongi Solondau, oku Swau ambatisalela ovanthu. Sesusi wahandele Swau emumbatisale, mahi Swau emupopila okuti: ‘Ame hipondola okukumbatisala. Ame ñgeno ndyimbatisalwa noove.’ Sesusi atolela Swau ati: ‘Siovaa wahanda ame ndyimbatisalwe noove.’ Avanyingila momaande Mondongi yo Solondau, Swau ayaveka Sesusi olutu aluho momaande.

Etyi Sesusi atunda momaande, elikwambela. Opo yatyo, eulu aliikuka omphepo ya Huku aimulaukila ngopomba. Keulu akwiivala ondaka ya Siovaa yati: “Ove Umona wange ndyihole; wanthyambukiswa.”

Etyi omphepo ya Siovaa yalaukila Sesusi, Sesusi akala Kilisitu Mesiya. Pahe ahimbika otyilinga apelwe na Siovaa tyemwetele pano pohi.

Etyi Sesusi ambatisalwa, aende moluhandya akakala-mo ononthiki 40. Etyi atunda-ko, aende ku Swau. Etyi Swau amona Sesusi ukahi nokuya no kwe, apopi okuti: ‘Tala ei Ondyona ya Huku ipola onkhali mouye.’ Swau wapopia ngootyo mokonda ankho wahanda ovanthu vanoñgonoke okuti Sesusi o Mesiya. Utyii oityi tyamonekele-po etyi Sesusi apita moluhandya? Tutalei.