Sesusi wali nomapanga ae etatu ankho vakala ko Mbetania. O Lasalu nonomphange mbae, Maliya na Malata. Nthiki imwe, pweetyi Sesusi ekahi himba lina o Solondau, Maliya na Malata avatumu omunthu akapopile Sesusi okuti: ‘Lasalu wavela unene. Endyu-vo umutale!’ Mahi Sesusi ahaende liwa. Akala vali ononthiki onombali, pahe apopila ovalongwa vae okuti: ‘Twendei ko Mbetania. Lasalu ulele ame mankhemupahula-po.’ Ovatumwa avemupopila okuti: ‘Ine Lasalu ulele, ha mapinduka-po.’ Sesusi evepopila okuti: ‘Lasalu wanyima.’

Etyi Sesusi ehika ko Mbetania, palambele ononthiki ononkhwana apa Lasalu apakwa. Avasa ovanthu ovanyingi veya okuungumanesa o Malata na Maliya. Etyi Malata eiva okuti Sesusi weya, ahateka opo vekelivase nae. Etyi emuvasa ati: “Tatekulu, ine wali pano, ñgeno omphange yange kanyimine.” Sesusi emupopila okuti: ‘Omphange yove makala vali nomwenyo. Ove otyo utyitavela Malata?’ Ngwe ati: ‘Ame ndyitavela okuti ha makatutila.’ Sesusi emupopila okuti: “Ame tutilo, ame mwenyo.”

Pahe Malata aende ku Maliya emupopila okuti: ‘Sesusi weya.’ Maliya ahateka noku Sesusi, ovanthu ovanyingi avemulandula. Etyi ehika pwe, aikila konongolo, alili unene. Ati: ‘Tatekulu, ine wali pano, omphange yange ñgeno kankhile!’ Sesusi etyimono okuti tyemwihama unene, nae ahimbika okulila. Etyi ovanthu ovanyingi vamona okuti ukahi nokulila, avati: ‘Sesusi ankho tyili-tyili uhole umwe Lasalu.’ Mahi vamwe ankho velipula okuti: ‘Omokonda yatyi ahahakulilile epanga liae?’ Oityi Sesusi alingile?

Sesusi aende naapa vemupaka, pombundi vapatele-po emanya limwe enene. Evepopila okuti: ‘Polei-po emanya.’ Malata ati: ‘Mahi palamba-le ononthiki ononkhwana! Tyafwa pahe wanika.’ No ngootyo, avapolo-po emanya, Sesusi elikwambela ati: ‘Tate, napandula unene etyi unthehelela. Ame ndyityii okuti apeho  unthehelela, mahi napopila vala peulu mokonda yovanthu ava opo vanoñgonoke okuti ove wanthuma.’ Pahe akaluluka ati: “Lasalu tunda-mo!” Apamoneka otyipuka tyimwe tyihuvisa: Lasalu atundu-mo, mahi wawingilwa movinyanga. Sesusi ati: “Muwingululei, muyekei aye.”

Ovanthu ovanyingi vali-po, avakala nonthumbi mu Sesusi. Vamwe avaende, avakapopila ova Faliseu. Okutuka opo, ova Faliseu avapange okwiipaa Lasalu na Sesusi. Umwe povatumwa 12, Sunda Isikaliyote, aende kova Faliseu evepulu okuti: ‘Mamumphe otyiñgapi ine ndyimukwatesako okukwata Sesusi?’ Avati matukwavela onombongo 30 mbopalata. Sunda ehimbika okusoka oñgeni mapakula Sesusi kova Faliseu.