Sesusi ankho kahakula vala ovanthu vokwavela nokututilisa ovanthu vokwankhia, mahi tupu ankho utyivila okutuliya omphepo nombila. Etyi Sesusi amana okulikwambela komphunda, tyina akati ñgaa Kelunga lyo Ngalileya kuna omphepo onene. Ovatumwa ankho veli mowato, avahetekela okutaha owato mahi ankho ukahi vala nokutahulwa nomphepo. Sesusi aendela kombanda yomaande aviuku kuvo. Etyi ovatumwa vamona omunthu ukahi nokwendela kombanda yomaande, avatili owoma. Sesusi evepopila okuti: ‘Ame. Mwahatilei owoma.’

Petulu ati: ‘Tatekulu, ine ove tyili, ndyihane ndyiye no kwoove.’ Sesusi emuti: ‘Endyu.’ Namphila ankho kuna omphepo onene, Petulu atuluka mowato aendela kombanda yomaande okuviuka ku Sesusi. Etyi ehika ponthele ya Sesusi, Petulu atale komphepo atili owoma. Ahimbika okunyingila kohi yomaande. Petulu ati: ‘Tatekulu, ndyovole!’ Sesusi emukwate menkhanya ati: ‘Omokonda yatyi watilila owoma? Onthumbi yove ili-pi?’

Etyi ovo Sesusi na Petulu vanyingila mowato omphepo aitalama. Otyo atyikalesa ñgeni ovatumwa? Atyivehuvisa unene avati: “Ove Umona umwe wa Huku.”

Olio ha liotete Sesusi alingile otyipuka tyihuvisa. Monthiki imwe, etyi Sesusi novatumwa vekahi nokuyauka elunga nowato, Sesusi alala. Pweetyi elele, akuya omphepo imwe onene. Omaande otyo aveta mowato, owato aiyula omaande. Ovatumwa avakapahula-po Sesusi, avati: ‘Mulongesi, kuno tuli nokunkhia! Tukwateseko!’ Sesusi akatuka, apopila elunga okuti: “Uti filuu!” Omphepo aitalama, akuti umwe filuu. Sesusi apulu ovatumwa okuti: ‘Onthumbi yenyi ili-pi?’ Avelipopila okuti: ‘Nomphepo umwe imutavela, nelunga limutavela.’ Ovatumwa avetyimono umwe okuti ine vayumba onthumbi mu Sesusi, kavesukisile okutila owoma otyipuka natyike.