Etyi Sesusi ambatisalwa, ahimbika okupopila ovanthu okuti: ‘Ouhamba wa Huku uli popepi.’ Aende novalongwa vae ko Ngalileya noko Sundeya. Etyi Sesusi akondoka kepunda-umbo liavo ko Nasalee, aende mondywo ya Huku, aikula ovihonekwa vya Isaiya, atange ati: ‘Siovaa wampha ononkhono mbae ndyiivise oviwa ovipe.’ Otyo tyahanda okutiwi? Otyo okuti namphila ovanthu ankho vahanda okutala Sesusi tyina alinga ovipuka vihuvisa, mahi ononkhono apelwe na Huku haunene wembupelelelwe apopile ovanthu oviwa ovipe. Pahe apopila ovanthu veli nokumutehela okuti: ‘Hono ovipuka ovio viafwiswa-po.’

Sesusi aende Kelunga lyo Ngalileya, avasa-ko ovalongwa vae vekwana vekahi nokufwa ombisi. Eveti: ‘Ndandulei, ame ndyimulinge ovafwi vovanthu.’ Ovalongwa ovo o Petulu na Andelee na Tiaku na Swau. Kavasetele-ale avasi-po omawanda avo, avalandula Sesusi. Aveho avaende ko Ngalileya, okukaivisa Ouhamba wa Siovaa. Ankho vaivisila mondywo yokufendela, noponopalasa no momatapalo. Ovanthu ovanyingi avevelandula oku vaya nako. Ovanthu aveho aveivi ovipuka Sesusi eli nokulinga atee umwe voko Silia.

Sesusi aavela ovalanduli vae ononkhono ononene, navo avetyivili okuhakula ovavei nokutaata ovilulu movanthu. Vamwe povalongwa vae avakaivisa nae momapunda-umbo, nokohika ononkhwavo. Ovakai vali neyumba-nthumbi, o Maliya Mandalena na Swana na Susana, novakwavo vali, vakwatesileko Sesusi novalongwa vae.

Etyi Sesusi alongesa ovalongwa vae, pahe evetumu vakalongese. Avakaivisa ko Ngalileya, ovanthu ovanyingi avakala ovalongwa avambatisalwa. Mokonda ovanthu ovanyingi ankho vahanda okukala ovalongwa, Sesusi eveeleka nepia liayela. Apopi okuti: ‘Itei ku Mwene wepia atume vali ovaundapi.’ Pahe akoyo ovalongwa 70, evepungu vevali-vevali avakaivisa mo Sundeya. Avalongesa ovanthu aveho etyi tyiyemba Kouhamba wa Huku. Ovalongwa avakondoka  tyahambukwa, avatolela Sesusi evi valinga-linga. Eliapu litupu-ale etyi ankho lipondola okulinga opo litalameke ovilinga viokwivisa.

Sesusi ankho una onthumbi yokuti ovalongwa mavatwalako notyilinga otyo otyinene tyina amakondoka keulu. Evepopila okuti: ‘Longesei oviwa ovipe kombanda yohi aiho. Longesei ovanthu mouye auho etyi tyayemba ku Huku amuvembatisala.’