Etyi Sesusi ena ovatumwa mondywo valingila o Pasikwa, evepopila okuti: ‘Onwe amuho hono mamunthyipo.’ Petulu ati: ‘Au! Namphila vakwetu vapondola okukusapo, ame himekusipo.’ Mahi Sesusi apopila Petulu ati: ‘Putyina ekwandambolo lihenepopie, ove mopopi tutatu okuti kundyi.’

Etyi ovanthu vakwata Sesusi, avemutwala kondywo ya Kaifaa, vamwe povatumwa avakahateka. Mahi vevali avalandula movanthu. Umwe o Petulu. Anyingila meumbo lya Kaifaa, aende potupia akayota. Potupia opo, omukai umwe uundapa mondywo ya Kaifaa, atale Petulu apopi okuti: ‘Ame ndyikwii! Ove ankho una Sesusi!’

Petulu ati: ‘Ame hame-ko! Etyi ukahi okupopia ame hityii!’ Petulu atundu-po. Apakala vala katutu, amonwa nomukai omukwavo, omukai oo apopila ovanthu okuti: ‘Omulume ou nae ankho una Sesusi!’ Petulu ati: ‘Ame Sesusi himwii!’ Omulume umwe ati: ‘Ove, ove umwe puvo! Etyi upopia tyiivala umwe okuti umu Ngalileya.’ Mahi Petulu ati: ‘Ame himwii!’

Ekwandambolo kuna alipopi. Petulu atale ku Sesusi, Sesusi nae emutale. Ahinangela etyi Sesusi apopile, aende kondye, alili unene.

Vombonge Onene yova Sundaa avelipakaila-mo opo vakoyesile Sesusi mondywo ya Kaifaa. Vahandele umwe okwipaa Sesusi, mahi opo vemwipae ankho vena okutala inkha una otyipuka alinga tyimwipaesa. Mahi Sesusi kalingile natyike tyapenga. Kaifaa apulu Sesusi, ati: ‘Ove umona umwe wa Huku?’ Sesusi ati: ‘Ame umwe.’ Kaifaa ati: ‘Ñgaa nkhele tyahanda vali onombangi etyi? Wapenya Huku!’ Ovanthu aveho avati: ‘Omulume ou una okwipawa.’ Avavete Sesusi, avemunthili omate. Avemuhiki motyipala otyo vemuveta, avapopi okuti: ‘Mokonda umuuli, pahe popia olie wekuveta?’

 Etyi kwatya, avatwala Sesusi Mombonge Onene yova Sundaa, avemupulu vali okuti: ‘Ove umona umwe wa Huku?’ Sesusi ati: ‘Mwene onwe mwetyipopia.’ Avahimbika okumutendeleya, avati wapopia omapita Huku, avemutwala kondywo yomutumini wo Loma utiwa o Posiu Pilatu. Oityi vali valingile? Tutalei.