Ovanakwa avatwala Sesusi komutumini Pilatu. Pilatu evepulu okuti: ‘Oityi omulume ou alinga?’ Ngwe avati: ‘Wapopia okuti ndyihamba!’ Pilatu apulu Sesusi ati: “Ove, ove Hamba yova Sundaa?” Sesusi ati: “Ouhamba wange ha wouye uno.”

Pilatu atumu ovanthu vatwale Sesusi ku Helonde, omutumini woko Ngalileya, opo atale inkha Helonde mavasi tyimwe tyapenga mu Sesusi. Helonde kavahile natyike tyapenga mu Sesusi, emukondola ku Pilatu. Pilatu apopila ovanthu ati: ‘Tyilinge Helonde, tyilinge ame, katwamwene natyike omulume ou alinga tyapenga. Ame mandyimuyovola.’ Mahi ovanthu avapopila peulu okuti: ‘Aipawe! Aipawe!’ Ovakwa-vita avavete Sesusi nongola, otyo vemunthila omate. Avemupake ohala yomakete komutwe, otyo vati: ‘Okamene, Hamba yova Sundaa.’ Pilatu apopila vali ovanthu okuti: ‘Ame hamwene natyike omulume ou alinga tyapenga.’ Ngwe avapopila peulu avati: “Ende momuti!” Pahe, Pilatu emuyeke opo akaipawe.

Avatwala Sesusi noko Ngolongota, avemutyindisa omuti, ngamo vemupapela. Sesusi elikwambela ati: ‘Tate veevela, etyi vekahi nokulinga kavetyii.’ Ovanthu otyo valinga omukwele Sesusi, avati: ‘Ine Umona wa Huku, tuluka momuti! Liyovola.’

Otyifwanga tyimwe tyapapelelwe momuti ponthele ya Sesusi atyiti: “Kanthyinangele-vo tyina wamehiki Mouhamba wove.” Sesusi emuti: “Ove mandyikakala noove Mouye Omupe.” Potyilongo opo, apakala enthiki onoola ononthatu. Vamwe povalongwa ankho vekahi ponthele yomuti apapelelwa, na Maliya mee ya Sesusi. Sesusi apopila Swau atekule Maliya nga mee yae.

Etyi eli nokumana omwenyo, Sesusi ati: “Atyiho tyalingwa!” Ayendeleka ehinga anyimi. Poola yatyo opo, apamoneka otyinimawe otyinene. Otyinyanga tyateta pokati omphangu ikola nomphangu ikola unene atyitanduka pokati. Omukwa-vita umwe apopi okuti: “Ou naina Omona wa Huku umwe.”