Etyi pakala, Petulu aende akafwa ombisi Melunga lyo Ngalileya. O Tomee na Tiaku na Swau novalongwa ovakwavo navo avaende. Valele melunga nokufwa ombisi, mahi avahakwate naike.

Komuhuka tyee, tyina vakati ñgaa omulume umwe uli koluhimba. Omulume oo eveihana, evepulu okuti: ‘Mwakwata ombisi?’ Avati: “Au!” Omulume oo evepopila okuti: “Yumbei owanda kokulio.” Avalingi etyi vapopilwa, owanda auyula ombisi onyingi, avehetyivili okuunanena mowato. Swau etyimono okuti omulume oo o Sesusi ati: “O Tatekulu!” Petulu okutyiiva, ahombokela momeva ayoo atee koluhimba. Ovalongwa ovakwavo avemulandula nowato.

Etyi vehika koluhimba, avavasi ombisi nonombolo potupia. Sesusi eveti etei vali ombisi tuyawise kwombu. Etyi amana okuyoka ombisi eveti: ‘Endywei mulie.’

 Etyi vamana okulia, Sesusi apulu Petulu okuti: ‘Unthyole vali tyipona okufwa ombisi?’ Petulu ati: ‘Eenga Tatekulu, ove utyii okuti ndyikuhole.’ Sesusi ati: ‘Nthita onondyona mbange.’ Sesusi emupulu vali okuti: ‘Petulu, ove unthyole umwe?’ Petulu ati: ‘Tatekulu, ove utyii okuti ndyikuhole.’ Sesusi ati: ‘Nthita oundyona wange.’ Sesusi emupulu vali lya tatu. Petulu anumana. Ati: ‘Tatekulu, ove ovipuka aviho uvii, utyii nawa okuti ame ndyikuhole.’ Sesusi emupopila okuti: ‘Lisa oundyona wange.’ Emupopila vali okuti: “Apeho ndandule.”