Mepunda-umbo lyo Sesaleya, mwali omukwa-vita umwe wo Loma wankhimanene utiwa o Koloneliu. Namphila ankho ha mu Sundaa, mahi ova Sundaa vemulinga onthilo. Ankho ukwatesako vokwahepa novanthu ovakwavo vesukisa okukwateswako. Koloneliu wali nonthumbi mu Siovaa, ankho apeho ulikwambela ku Huku. Nthiki imwe, oandyu imwe aimonekela Koloneliu, aimupopila okuti: ‘Huku weiva omalikwambelo ove. Pahe tuma ovanthu vaye kepunda-umbo lyo Sope, oku kuna Petulu vekemwihane.’ Koloneliu atumu ovalume vetatu ko Sope, ankho paendwa onokilometulu 48.

Etyi Petulu ekahi ko Sope, nae una etyi amwene. Wamwene ovinyama ova Sundaa vahapondola okulia, eivi ondaka yemupopila opo alie ovinyama ovio. Petulu aanye, ati: ‘Ame hinelie ovinyama viasila.’ Ondaka oyo ati: ‘Wahatie ovinyama ovio viasila. Huku wevisukukisa.’ Petulu tupu apopilwa okuti: ‘Pombundi yove pena ovalume vetatu. Enda navo.’ Petulu avasi ovalume ovo pombundi, evepulu oityi veya okulinga. Ovalume ovo avati: ‘Onthwe twatumwa na Koloneliu, omutumini wovakwa-vita vo Loma. Enda mukelivase nae keumbo liae ko Sesaleya.’  Petulu apopila ovalume ovo opo valale. Etyi kwatya, avende navo ko Sesaleya, na vakwavo ovalongwa va Sesusi vokwatundile ko Sope.

Etyi Koloneliu amona Petulu, emuhatekela, aikila konongolo. Mahi Petulu emupopila okuti: ‘Katuka! Ame ndyimunthu vala ngoove. Huku wamphopila opo ndyiye kuno, namphila ova Sundaa veheliende na vana vehe va Sundaa. Pahe, mphopile omokonda yatyi wandyihanena?’

Koloneliu apopila Petulu okuti: ‘Ononthiki ononkhwana konyima oku, ame ankho ndyikahi nokulikwambela ku Huku, oandyu imwe ainthumu ndyikwiihane. Tatekulu tulongese ondaka ya Siovaa.’ Petulu apopi okuti: ‘Pahe nanoñgonoka okuti Huku utupu okapungulula. Utavela kese munthu una onthilo nae.’ Petulu evelongesa ovipuka ovinyingi konthele ya Sesusi. Koloneliu atambula omphepo ikola novanthu aveho vekahi meumbo liae, avambatisalwa.