Siovaa wati: ‘Mandyikasekuna ononkhuka momaiho avo, kakukankhiwa vali, kakukalilwa vali, kakukaululwa vali onkhwo, nii onongembia kambukakala-ko vali. Ovipuka vyo kohale vialamba-le.’

Siovaa wapakele Andau na Eva motyitaka tyo Endene, wahandele vakale-mo nehambu nombembwa. Ankho vena vala okufenda Tate yavo wo keulu, avayulisa ohi novana vavo. Andau na Eva kavatavelele Siovaa, mahi no ngootyo etyi Huku ahandele atyihapiluluka. Momukanda ou twelilongesa okuti ovipuka aviho Huku apopia vifwiswa-po. Ouhamba wae maukaetela ovipuka oviwa ovanthu aveho ngeetyi apopilile Ambalayau.

Satanasi novilulu viae, novanthu aveho valinga ovivi mavakahanywa-ko. Ovanthu aveho mavakafenda vala Siovaa. Kamatukavela vali nii okunkhia. Ononthiki ambuho matukakala  nononkhono, atukahambukwa unene. Ohi maikehiwa, ovanthu avakakala nombembwa. Ovanthu aveho mavakakala nokulia okunyingi nonondywo mbukahi nawa. Ovanthu mavakakala ovana-mbembwa, kakukakala vali ovanthu ovakalavi. Ovinyama kavikatila vali owoma ovanthu, onthwe katukevitila vali owoma.

Matukala nehambu enene tyina Siovaa amahimbika okututilisa ovanthu vokwanyima. Matukakala novanthu vakaleleko kohale, o Ambele na Nowee na Ambalayau na Sala na Mwisesi na Luti na Sitele na Ndaviti. Navo mavakaundapa motyilinga tyokuviukisa Ohi ihiwe nawa. Matukalinga ovilinga ovinyingi vihambukiswa.

Siovaa wahanda ove ukakale-mo. Ove mokanoñgonoka umwe vali nawa-nawa Siovaa. Tutwaleiko okufwena vali ku Siovaa ononthiki ambuho, pehepano, atee-tee!