Etyi Sesusi akondoka keulu, apala onononthiki 10 ovalongwa vae avatambula omphepo ikola. Veitambulile motyipito tyo Pendekosite menima 33 Pomuvo wa Kilisitu. Ovanthu vatundilile kovilongo ovinyingi, aveya motyipito otyo mo Selusalei. Pali ovalongwa 120 va Sesusi veliongiyile mondywo imwe. Apamoneka otyipuka tyimwe tyihuvisa. Otyipuka tyimwe tyikahi ngotupia atyilapela komitwe viovalongwa, avahimbika okupopia omalaka elikalaila. Mondywo oyo, amwivala omuvielo umwe omunene uti vala otyipepe.

Ovanthu vokweile mu Selusalei vokwatundile kovilongo ovikwavo, etyi veiva omuvielo oo, avahatekela mondywo oyo okukatala oityi tyaenda-po. Avahuvu unene etyi veiva ovalongwa vapopia omalaka elikalaila. Avapopi okuti: ‘Mahi ovanthu ava ova Ngalileya. Oñgeni vetyivila okupopia omalaka etu?’

Petulu, novatumwa ovakwavo avakala komutwe wovanthu. Petulu apopila ovanthu oñgeni Sesusi aipaelwe, noñgeni Siovaa emututilisa.  Petulu ati: ‘Pahe Sesusi uli keulu kokulio kwa Huku, wetwavela omphepo ikola. Otyo mweivila ovipuka evi vihuvisa onwe mweete.’

Onondaka Petulu apopile mbakwatesileko ovanthu avati: ‘Oityi tuna okulinga?’ Ngwe eveti: ‘Livelei amumbatisalwa menyina lya Sesusi. Mamupewa omphepo ikola.’ Monthiki oyo, ovanthu 3.000 avambatisalwa. Okuhimbikila opo, ovalongwa avahimbika okuliyawisa mo Selusalei. Mokonda vakwatesilwe-ko nomphepo ikola, ovatumwa avaonganeka omawaneno omanyingi, avalongesa ovalongwa ovipuka aviho Sesusi evetumine.