ELONGESO 100
Paulu na Timotiu
Timotiu ankho omukwendye umwe wo mewaneno lyo ko Lisitala. Tate yae ankho omu Ngeleku, me yae ankho omu Sundaa. Me yae utiwa o Eunise, ina mukulukai o Loinde. Ovakulu ovo valongesile Timotiu okutuka poututu etyi tyayemba ku Siovaa.
Etyi Paulu akapila ko Lisitala moungendi wae wa vali wokwivisa, wamwene okuti Timotiu uhole vakwavo, uvekwatesako. Paulu aiti Timotiu opo vaye aveho. Paulu walongesile Timotiu okwivisa nokulongesa nawa oviwa ovipe.
Omphepo ikola aihongolela Paulu na Timotiu oku ankho vena okwenda. Nthiki imwe kounthiki, Paulu eivi ondaka yomulume umwe aiti, kwata ko Masendonia utukwateseko. O Paulu na Timotiu na Sila na Luka avaende-ko vakaivise nokwonganeka omawaneno.
Ko Tesalonika mepunda-umbo lyo Masendonia, ovalume novakai ovanyingi avakala ovalanduli va Kilisitu. Mahi ova Sundaa vamwe avalu onkhi Paulu naava ekahi nokwenda navo. Ova Sundaa ovo avevetendeleya, avapopila ovatumini okuti: ‘Ovalume ava onondyale mbovatumini vo Loma!’ Mokonda o Paulu na Timotiu okukala motyilongo omo mavaipawa, kounthiki avahene motyilongo omo avaende noko Mbeleya.
Ovanthu voko Mbeleya vetyihole tyokulilongesa oviwa ovipe, ova Ngeleku nova Sundaa vakalako avetavela ondaka ya Huku. Ova Sundaa vamwe avatundu ko Tesalonika avaende ko Mbeleya vakatyopole ovilinga vya Paulu, Paulu atundu-ko aende noko Atena. O Timotiu na Sila avesala mo Mbeleya opo vapameke vakwavo vafenda navo. Nthiki imwe, Paulu atumu Timotiu akondoke ko Tesalonika opo akakwateseko vakwavo veli nokumoneswa ononkhumbi. Etyi pakala, Paulu atumu vali Timotiu akatalelepo omawaneno amwe akapameke vakwavo.
Paulu wapopilile Timotiu okuti: ‘Vana vahanda okulingila Siovaa mavamoneswa ononkhumbi.’ Timotiu wamonesilwe ononkhumbi, apakwa mokaleya mokonda wali nonthumbi mu Huku. Ahambukwa mokonda kayekele-po Siovaa, wakakatelele mwe.
Paulu wapopilile ova Filipu okuti: ‘Ame mandyimutumu Timotiu emulongese etyi tyihangununa okwendela motyili, noñgeni tyiiviswa.’ Paulu ankho uyumba onthumbi Timotiu. Timotiu na Paulu vali omapanga, avaundapela kumwe omanima omanyingi.
“Ndyitupu vali ou wapepuka omutima ngae, oe vala mesuku umwe nokumulingila etyi mwahanda. Mokonda vakwavo aveho vesuka vala mwene neetyi vahanda, etyi tya Kilisitu Sesusi vetupu-tyo.” — Ova Filipu 2:20, 21
Hamwe Noove Uhanda
LONGESA OVANA VOVE
Timoteo Ankho Uhanda Okukuatesako Ovanthu
Oñgeni upondola okukala nehambu enene momuenyo nga Timoteo?
OMUTALA WOMULAVI
“Omona Wange mu Tatekulu, Onthyolwe Nayumba Onthumbi”
Oityi tyakuatesile-ko Timoteo omukuendye ankho wokuna ohonyi, okukala Omukristau omukulu wewaneno wayumbua onthumbi?
