Omulume umwe otyilema ankho apeho uvasiwa pombundi yondywo ya Huku nokwita osimola. Nthiki imwe komutenya, amono o Petulu na Swau vanyingila mondywo ya Huku. Evepopila okuti: ‘Mbambavo mpheivo otyipuka tyimwe.’ Petulu ati: ‘Ame ndyina otyipuka tyimwe otyiwa vali tyipona onombongo, nahanda okukwavela. Menyina lya Sesusi, katuka enda!’ Petulu emukatula, omulume oo ahimbika okweenda! Ovanthu avahuvu unene notyipuka otyo alingile tyihuvisa, ovanyingi avetavela ondaka ya Huku.

Ovanakwa nova Sanduseu avanumana unene. Avakwate ovo Petulu na Swau avevetwala kombonge yonomphela avati: ‘Olie wemupa ononkhono mbokuhakula omulume ou?’ Petulu ati: ‘Onthwe twapewa ononkhono na Sesusi Kilisitu, una onwe mwaipaa.’ Ononkhalamutwe mbonongeleya avati: ‘Mwahapopiei vali Sesusi!’ Mahi ovatumwa avati: ‘Onthwe matupopi Sesusi. Kamatutalama.’

Etyi Petulu na Swau vayekwa, avaende kovalongwa vakwavo avevepopila etyi tyaenda-po. Aveho avelikwambela avaiti ku Siovaa okuti: ‘Tukwateseko-vo opo tutyivile okutwalako okulinga ovilinga viove.’ Siovaa eveavela omphepo yae ikola, avatwalako okwivisa nokulongesa. Ovanthu ovanyingi avetavela ondaka ya Huku. Ova Sanduseu avavete ovatumwa, avevepake mokaleya. Kounthiki watyo, Siovaa atumu oandyu, aiikula omapito okaleya, oandyu oyo aivepopila okuti: ‘Kondokei kondywo ya Huku ngako mukalongesa.’

Etyi kwatya, vokuyunga avakapopila Vombonge Onene yononkhalamutwe mbova Sundaa, okuti: ‘Twavasa okaleya kaikwa, mahi ovanthu vapakelwe-mo kave-mo! Twevevasa mondywo ya  Huku nokulongesa ovanthu!’ Etyi vetyiiva, avakakwata ovatumwa, avevetwala Kombonge Onene yova Sundaa. Omunene-nakwa evepopila okuti: ‘Onthwe twemutuma opo muhapopie vali Sesusi!’ Mahi Petulu ati: ‘Tuna okutavela ku Huku tyipona kovanthu.’

Ononkhalamutwe mbonongeleya ambunumana unene, avahande okwiipaa ovatumwa. Mahi omu Faliseu umwe utiwa o Ngamaliyeli evepopila okuti: ‘Lungukei! Huku ukahi novalume ava. Onwe muhanda umwe okulwisa Huku?’ Avetavela etyi evepopila. Avavete ovatumwa novimuti, avepopila vahaivise vali, aveveyeke vende. Mahi ovatumwa avahayeke-po okwivisa. Avatwalako okwivisa oviwa ovipe nombili, tyilinge mondywo ya Huku tyilinge momaumbo.