Saulu ankho omu Loma, watyitilwa ko Talusu. Ankho omu Faliseu wii nawa Ovitumino viova Sundaa, uyele ovalongwa va Kilisitu. Saulu wamonesile ovalongwa va Kilisitu ononkhumbi, tyilinge ovalume tyilinge ovakai, ankho uvepola momaumbo avo evepake mokaleya. Etyi ovanthu vamwe ovakalavi vavetele Sitevau nomamanya avemwipaa, na Saulu wali-po.

Mahi okumonesa vala ononkhumbi Ovalongwa va Kilisitu mo Selusalei kwe ankho katyituuka. Aiti komunene-nakwa akakale kepunda-umbo lyo Ndamasiku, akakwate ovalongwa va Kilisitu vakala-ko. Etyi ekahi nokuhika ko Ndamasiku, akati vala ñgana otyimimi tyimwe tyemuliaimina ahamonopo. Eivi ondaka yati: ‘Saulu, omokonda yatyi umonesila ononkhumbi?’ Saulu apulu okuti: ‘Ovelie?’ Ati: ‘Ame Sesusi. Enda ko Ndamasiku ukanoñgonoke etyi una okulinga.’ Saulu akala omumphoki, akwatwa menkhanya okutwalwa no mepunda-umbo.

Ko Ndamasiku, ankho kuna omulongwa wa Kilisitu wali nonthumbi mu Huku utiwa o Ananiya. Sesusi emupopila memonekelo okuti: ‘Enda keumbo lya Sunda, kwata kondyila itiwa Yaviuka, kaovole-ko omulume utiwa o Saulu.’ Ananiya ati: ‘Tatekulu, omulume oo ame ndyimwii nawa! Ukahi nokukwata ovalongwa ovanyingi opo evepake mokaleya!’ Mahi Sesusi emuti: ‘Enda-ko. Ame naholovona Saulu, opo akaivise oviwa ovipe kovilongo ovinyingi.’

Ananiya aende, avasi Saulu, emupopila okuti: ‘Saulu, mukulu wange, Sesusi wanthuma kwoove opo ndyikupatule omaiho.’ Omaiho a Saulu aapatuka amonopo. Elilongesa konthele ya Sesusi akala omulongwa wae. Etyi ambatisalwa, akala Omukwa-Kilisitu, ahimbika okwivisa monondywo mbokufendela, kumwe  novalongwa ovakwavo va Kilisitu. Ove upondola okusoka oñgeni ova Sundaa vahuvile etyi vamona Saulu ulongesa ovanthu konthele ya Sesusi? Vapopile okuti: ‘Omulume oo hae wamonesile ononkhumbi ovalongwa va Sesusi?’

Saulu walongesile ovanthu vakala mo Ndamasiku omanima etatu. Ova Sundaa ankho veyele Saulu, avalingi omphango opo vemwipae. Mahi vakwavo etyi vetyiiva okuti vahanda okumwipaa, avemukwatesako aye nkholo. Avemupake mosesu, avalingi emphana motyimato ngapo vemukwatesa.

Etyi Saulu ehika ko Selusalei, ahande okuliwaneka na vakwavo veli-mo. Mahi ankho vemutila owoma. Omulongwa umwe una okankhenda, utiwa o Mbalanambee emutwala kovatumwa, evepopila okuti Saulu wapiluluka. Saulu aivisa oviwa ovipe novomewaneno mo Selusalei. Pahe atiwa o Paulu.