Nowee, nombunga yae, novinyama vanyingilile motyikasa. Etyi Siovaa aika epito, ombila aihimbika okuloka. Ailoko unene, otyikasa atyiyalala kombanda yomaande. Ohi aiho aiyula omaande. Ovanthu aveho onondingavivi ankho vekahi kondye yotyikasa, avankhi. Mahi Nowee nombunga yae avahupu. Okuti ove upondola okusoka ehambu vakala nalio mokonda yokwetavela ku Siovaa?

Ombila ailoko ovitenya 40 novinthiki 40, aitalama. Katutu-katutu omeva aahimbika okutepuluka. Otyikasa atyikala kombanda yomphunda. Mahi nkhele kombanda yohi ankho kuna omaande omanyingi, Nowee nombunga yae nkhele ankho kavapondola okulupuka motyikasa.

Katutu-katutu, omaande aahimbika okutepuluka. Nowee nombunga yae ononthiki vakalele motyikasa mbulamba penima. Pahe Siovaa evepopila opo vatunde motyikasa avakala motyilongo tyimwe tyakala otyipe. Avapandula unene mokonda Siovaa wevehupisa, avalekesa okuti vapandula etyi valingila Siovaa otyilikutila.

Siovaa ahambukwa notyilikutila valinga. Siovaa apopi okuti kamahanye vali ovipuka vikahi pohi nombila. Apake-ko omuvia wonkhongolo meulu ine omphumba, otyilekeso tyomphango alinga. Okuti nthiki imwe wamwene-ale onkhongolo ine omphumba?

Konyima Siovaa apopila Nowee nombunga yae opo vakale novana, avayulisa ohi.