Etyi Isake anepa Lembeka ankho una omanima 40. Ankho uhole unene Lembeka. Etyi pakala, avakala novana vevali omapaha.

Omukulu watyo utiwa o Isauu, omututu watyo o Sakoo. Isauu ankho kakala meumbo, ankho utyihole tyokuyeva. Mahi Sakoo ankho ukala meumbo.

Kohale, tyina he amankhi omona wotyiveli oe upingana ovipuka ovinyingi vali ku vakwavo, ohika nonombongo. Ovipuka ovio apewa epingo. Mweevi ovana va Isake mavapingana mwati novipuka oviwa Siovaa apopilile Ambalayau. Isauu ankho kesukile novipuka ovio, mahi Sakoo wesukile navio mokonda ankho utyii okuti ovinene.

Onthiki imwe, Isauu akayeva, etyi ehika meumbo ankho waponwa unene. Weiva okulia kwanika nawa Sakoo ateleka, apopi okuti: ‘Naliwa unene nondyala! Mphevo okulia!’ Sakoo emupopila okuti: ‘Mankhwavela, mahi tete ndandese ouveli wove.’ Isauu ati: ‘Ouveli wange maumphe-tyi? Upondola okukala otyiveli. Etyi nahanda vala okulia.’ Ove usoka okuti etyi Isauu alinga tyaviuka? Au, katyaviukile. Isauu wakumana otyipuka otyinene vali nokulia.

Etyi Isake akulupa, pahe ankho una yokupeleyila oviwa omona wae wotyiveli.  Mahi Lembeka akwatesako Sakoo, omona omututu watyo, ngae upeleyilwa oviwa. Etyi Isauu etyinoñgonoka, anumana unene ahande okwiipaa ondenge yae. Isake na Lembeka avapopila Sakoo okuti: ‘Enda kakale ku Lambau, omphange ya me yove.’ Sakoo etavela etyi apopilwa noo tate yae aende, ahaipawa nomukulu wae.