Siovaa walaa Sakoo okuti memuyakulila ngeetyi ayakulilile Ambalayau na Isake. Sakoo akakala kotyilongo tyimwe tyitiwa o Halaa ngako anepela, akala novana ovanyingi, tupu akala omuhona.

Etyi palamba omanima amwe, Siovaa apopila Sakoo okuti: ‘Kondoka kotyilongo tyo tate yove.’ Sakoo nombunga yae avahimbika okulinga oungendi. Etyi vekahi mondyila, ovanthu vamwe aveya ku Sakoo, avemupopila okuti: ‘Omukulu wove Isauu ukahi nokuya novalume 400!’ Sakoo atili owoma asoko okuti Isauu uhanda okumwiipaa kumwe nombunga yae. Elikwambela ku Siovaa ati: ‘Siovaa ndyovole-vo komukulu wange.’ Monthiki onkhwavo Sakoo atumikisa ku Isauu onongi, nonongombe, novinkhombo, nomakamelu, novimbulu.

Kounthiki etyi Sakoo ekahi aike, ukati ñgaa oandyu! Oandyu aihimbika okulwa nae. Avalala nokulwa atee kwatya. Sakoo atunguka, mahi no ngootyo alu vala noandyu. Oandyu aiti: ‘Ndyeke ndyende.’ Mahi Sakoo ati: ‘Himekuyeke wende ohamphele elao.’

Oandyu aipe Sakoo elao. Pahe, Sakoo ankho utyii okuti Siovaa memukwatesako, Isauu ehemulingi natyike.

Monthiki oyo, Sakoo amonena Isauu novalume 400 kokule. Sakoo apiti komutwe wombunga yae aikila konongolo ovikando  epandu-vali. Isauu ahatekela ku Sakoo avelihumbakana. Avahimbika okulila, avelievela, pokati kavo apakala ombembwa. Tyina usoka, otyipuka otyo Sakoo alingile tyakalesile ñgeni Siovaa?

Isauu akondoka keumbo liae, Sakoo aende kotyilongo tyo tate yae. Sakoo wali novana ovakwendye 12. Omanyina avo oyaa: o Lumbe na Simiyau na Levii na Sundaa na Ndaa na Nafitalii na Ngande na Asele na Isakale na Sembulau na Susee na Mbesamii. Susee oe Siovaa akoyele ayovole ovanthu Vae. Ove utyii oñgeni eveyovolele? Tutalei.