Mwisesi na Alau vakapopila Falaoo onondaka mba Huku mbati: ‘Inkha kuyeke ovanthu vange vaye, mandyieta-ko ononyiki mbumwe ononene motyilongo.’ Falaoo ehetavela, ononyiki ononyingi ambunyingila monondywo mbova Isitu, tyilinge monondywo mbovahona tyilinge movahepi. Otyilongo atyiho atyiyula ononyiki. Mahi pohika pakala ova Isilayeli, patiwa opo Ngosene apahakala ononyiki. Okuhimbikila povihuna vya kwana ova Isitu vala vamonesilwe ononkhumbi. Falaoo ati: ‘Ita ku Siovaa apole-ko ononyiki ombu, ovanthu vae vaye.’ Mahi etyi Siovaa apola-ko ononyiki, Falaoo ahayeke ova Isilayeli. Okuti Falaoo una etyi elilongesilile-ko?

Siovaa apopi okuti: ‘Ankho Falaoo kayeke ovanthu vange, ovipako viavo aviho mavivele avinkhi.’ Monthiki onkhwavo, ovipako avihimbika okunkhia. Mahi ovipako viova Isilayeli avihankhi. No ngootyo, Falaoo aanye okuyeka ova Isilayeli vaye.

Siovaa apopila Mwisesi apole etwe mofolono akondoke ku Falaoo, emupopila okuti tyina wamehiki-ko oliyumbu peulu. Eulu aliho mo Isitu maliyula ombundu. Tyina ombundu ihimbika okutepuluka ovanthu aveho mo Isitu novinyama avakala novipute. No ngootyo Falaoo ahayeke ova Isilayeli vaye.

Siovaa atumu vali Mwisesi ku Falaoo. Mwisesi apopi okuti: ‘Ove nkhele kuhande  okuyeka ovanthu vange? Muhuka, mandyilokesa ongandavila imwe onene mo Isitu.’ Monthiki onkhwavo Siovaa aetako ongandavila imwe onene mo Isitu, notupia. Omiti aviho, novikuna avihanywa-po, akuhupu vala vyo ko Ngosene. Falaoo apopi okuti: ‘Tolela Siovaa opo atalameke ombila! Mupondola okwenda.’ Mahi etyi ombila yatalama, Falaoo eheveyeke.

Mwisesi ati: ‘Omiti aviho viahahayenwe nongandavila maviliwa novimphunia.’ Mo Isitu amuya ovimphunia ovinyingi avili-po atyiho tyahupile kongandavila. Falaoo apopi okuti: ‘Tolela Siovaa opo apole-mo ovimphunia evi.’ Siovaa evipolo-ko, Falaoo no ngootyo eheveyeke.

Siovaa atolela Mwisesi okuti: ‘Yelula omavoko ove no peulu.’ Wati vala yelulee omavoko, akunthikovela. Ova Isitu avakala ononthiki ononthatu otyo vahamono natyike. Ova Isilayeli vala ankho vena otyimimi ponondywo mbavo.

Falaoo apopila Mwisesi okuti: ‘Ove novanthu vove mupondola okwenda. Mahi ovipako vienyi visale.’ Mwisesi ati: ‘Ovinyama vietu tuna okwenda navio, matukalingila ovilikutila Huku yetu.’ Falaoo anumana unene. Apopi okuti: ‘Tundei ponthele yange! Tundei pano, ine mukondoka vali mandyimwipaa.’