Pakala vala katutu, etyi Falaoo eiva okuti ova Isilayeli vatunda mo Isitu, elivele. Apopila ovakwa-vita vae okuti: ‘Kapolei omatemba ange ovilwa, tuvelandulei! Ñgeno ankho katuveyeke vaye.’ Falaoo novakwa-vita vae avalandula ova Isilayeli.

Siovaa ankho ukahi nokuhongolela ovanthu vae, komutenya uvehongolela nomukundu-kundu wekaka, kounthiki uvehongolela nomukundu-kundu wotupia. Wevetwala Kelunga Likuhuka, evepopila opo vakevele.

Ova Isilayeli vakati vala ñgaa, o Falaoo novakwa-vita vae vekahi nokuya. Ankho tyati oku elunga lievetyika oku ovakwa-vita va Falaoo veya. Ova Isilayeli avatili unene owoma! Avapopila Mwisesi okuti: ‘Hono matunkhi! Ñgeno kwetupolele ko Isitu.’ Mahi Mwisesi evepopila okuti: ‘Mwahatilei owoma. Kevelelei opo mutale oñgeni Siovaa metuyovola.’ Mwisesi wayumbile onthumbi mu Siovaa, ine hatyo?

Siovaa atolela ova Isilayeli opo vakatuke vaye. Omukundu-kundu wekaka Siovaa eupake pokati kova Isilayeli nova Isitu. Ova Isitu avakala menthiki. Mahi ova Isilayeli, avakala notyimimi.

 Siovaa atolela Mwisesi opo atandaveke okuvoko kombanda yelunga. Pahe Siovaa aeta-ko omphepo onene otyinthiki atyiho. Elunga alilitepuka pokati, apakala ondyila. Ova Isilayeli avetyivili okuyauka elunga.

Ovakwa-vita va Falaoo avalandula ova Isilayeli avanyingila melunga. Pahe Siovaa apipilisa ovakwa-vita ovo. Omalola omatemba ovilwa aatundu-ko. Ovakwa-vita aveliyavela avati: ‘Tukondokei! Siovaa ukahi nokuvelwila-ko.’

Siovaa apopila Mwisesi okuti: ‘Tandaveka vali okuvoko kombanda yelunga.’ Etyi atandaveka okuvoko, omaande aahonyo aaipaa ovakwa-vita aveho vova Isitu. Falaoo novakwa-vita vae aveho avankhi. Apahahupu nawike.

Etyi ova Isilayeli veli nthele ina elunga, aveho avahimbika okwiimba otyiimbo tyokupandula Huku avati: “Mandyiimbila Siovaa, tyeetyi wankhimana unene. Wayumba melunga onkhambe, no wokwendela-ko.” Putyina vaimba, ovakai otyo vanyana nokuhika onopandelu. Ovanthu aveho avahambukwa, mokonda vayovoka.