Pweetyi Mwisesi ekahi Komphunda Sinai, Siovaa emupopila atunge ekaka opo ova Isilayeli vafendele-mo Huku. Ankho lina okutungwa ngeetyi vapopililwe opo tyina velitungulula na tyina velityinda tyehevepwilise.

Siovaa apopi okuti: ‘Popila ovanthu vaave etyi vena opo vatunge ekaka liefendelo.’ Ova Isilayeli avaave opalata, noolu, nomamanya omawa, novinyanga, noseta, novipuka ovikwavo. Vaavele ovipuka ovinyingi, Mwisesi evepopila okuti: ‘Pahe tyapwa! Mwahaetei vali natyike.’

Ovalume novakai ovanyingi ovanongo navo vaundapele pokutunga ekaka liefendelo. Siovaa weveavelele ounongo wokulinga ovipuka ovinyingi. Atyiti vamwe vapangiya, nokunyika. Ovakwavo valinga ovipuka vimwe nomamanya omawa, noolu, nomiti.

Ovanthu avatungu ekaka liefendelo ngeetyi Siovaa evepopila. Vatunga ekaka limwe ewa, mokati avapake-mo otyinyanga tyiteta Omphangu Ikola Nomphangu Ikola Unene. Velitungile nomuti utiwa omu akasiya noolu. Momphangu Ikola ankho mukala okandiyelo koolu, nomesa nomutala wokuyokela ombao. Momphangu Ikola Unene mukala otyikasa tyalingwa nomuti utiwa omu akasiya noolu. Otyikasa otyo otyikasa tyomphango, ankho tyihinangelesa ova Isilayeli omphango valingile na Siovaa etyi vemupopilile okuti ove vala matutavela. Ove utyii otyityi tyitiwa okulinga omphango na mukwenyi? Otyipuka upopila mukwenyi oti mandyityilingi umwe.

 Siovaa aholovona Alau novana vae vakale ovanakwa opo vaundape mekaka liefendelo. Ankho vena okuyunga ekaka liefendelo nokulinga oviawa pala Siovaa. Alau ankho omunene-nakwa, oe vala unyingila Momphangu Ikola Unene. Ankho unyingila-mo like menima opo alinge otyilikutila Siovaa emwevele ononkhali mbae, no mboveumbo liae, no mbova Isilayeli aveho.

Ova Isilayeli vamanuhula okutunga ekaka liefendelo etyi palamba enima tundee etyi vatunda mo Isitu. Pahe ankho vena apa vafendela Siovaa.

Siovaa waeta ekaka liombila kombanda yekaka liefendelo pala okulekesa omunkhima wae. Tyina ekaka liombila liamatalama, ova Isilayeli navo avatalama. Tyina lienda nopeulu ova Isilayeli navo avakatuka. Avatungulula ekaka liefendelo avalandula ekaka liombila.