Etyi ova Isilayeli vekahi moluhandya, Kolaa na Ndataa na Ambilau novanthu 250 avatyitukilapo Mwisesi. Vapopila Mwisesi okuti: ‘Pahe kwapwa, hanwe-ko vali! Omokonda yatyi ove vala una okukala onkhalamutwe yetu, Alau akala omunene-nakwa? Siovaa tupu ukahi noonthwe, kekahi vala noove na Alau.’ Siovaa anumana unene. Wanumanene mokonda oe vatyitukilapo!

Mwisesi apopila Kolaa naava vahula ku Kolaa ati: ‘Muhuka endywei mekaka liefendelo, etelelei onoseke-seke, pakei-po otupia nombao. Siovaa malekesa olie mwene akoya.’

Onthiki onkhwavo, Kolaa novalume 250 avelivasi na Mwisesi mekaka liefendelo. Avahimbika okuyoka ovilikutila vilingwa vala novanakwa. Siovaa apopila Mwisesi na Alau okuti: ‘Lipungei ku Kolaa no kovanthu vahula kwe.’

Namphila Kolaa aile ku Mwisesi kekaka liefendelo, mahi Ndataa na Ambilau, nonombunga mbavo avaanye avahaende. Siovaa apopila ova Isilayeli vahakale popepi nekaka lya Kolaa no lya Ndataa, no lya Ambilau. Ova Isilayeli vati vala popilwee avahondovoka-po. Ndataa, na Ambilau, nonombunga mbavo  avalupuka momakaka avo. Pakala vala katutu, Siovaa aikula etoto limwe enene pohi avankhila-mo! Tupu Siovaa ayoko Kolaa novalume 250 vekahi kekaka liefendelo!

Siovaa apopila Mwisesi okuti: ‘Popila ova Isilayeli, uti vaete onomphangoti mbonohongoi mbomihoko aviho. Atyiti komphangoti ei wahoneka-ko enyina liohongoi yatyo, komphangoti ei wahoneka-ko enyina liohongoi yatyo. Mahi kotyimuti tyomuhoko wa Levii honeka-ko enyina lya Alau. Vipaka mekaka liefendelo. Ame mandyiyovesa onthemo otyimuti tyahonekwa enyina liomunthu nakoya.’

Muhuka tyee, Mwisesi aende mekaka liefendelo akapola-mo ovimuti. Otyimuti tya Alau otyo tyayova ononthemo. Ovanthu aveho avetyimono umwe okuti Siovaa wakoya Alau akale omunene-nakwa.