Omu Isilayeli umwe utiwa o Elekana ankho una ovakai vevali, Ana na Penina, mahi ankho uhole vali Ana. Penina ankho ukalela vala okulinga omukwele Ana mokonda utupu ovana, Penina ankho una ovana ovanyingi. Omanima aeho, Elekana ankho utwala ombunga yae ko Silo kekaka liefendelo. Monthiki imwe etyi vekahi ko Silo, Elekana etyimono okuti Ana wanumana unene, ukahi nokulila. Emupopila okuti: ‘Ana wahalile. Ove una ame. Ame ndyikuhole.’

Mahi, Ana nkhele ankho wanumana, aende ngoopo ekelikwambele. Ana otyo alila aiti Siovaa emukwateseko. Apopi okuti: ‘Siovaa ankho umpha omona omukwendye, ame mandyimupakula kwoove ekuundapela ononthiki ambuho mbomwenyo wae.’

Omunene-nakwa Elii, etyi amona Ana ukahi nokulila, asoko okuti wakolwa. Ana emupopila okuti: ‘Au, tatekulu ame hakolelwe. Ame ndyina ovitateka ovinyingi, neya okuvipopila Siovaa.’ Elii etyimono okuti etyi asokele hatyoko, apopi okuti: ‘Huku ekwavele etyi uhanda.’ Ana akala nawa, aende. Pakala vala katutu, Ana akutula omona omukwendye emuluku okuti o Samuwele. Upondola okusoka ehambu Ana akalele nalio?

 Ana kalimbwile-ko etyi apopilile Siovaa. Etyi Samuwele akupuka, Ana emutwala kekaka liefendelo. Atolela Elii okuti: ‘Omona naitile melikwambelo oyou. Malingila Siovaa ononthiki ambuho.’ Elekana na Ana ankho vakatalela-po Samuwele omanima aeho otyo vemutwaila ovikutu. Siovaa aavela vali Ana ovana vetatu ovakwendye novakainthu vevali.