Etyi mo Isilayeli mwakala ondyala, omukai umwe utiwa o Noemii ailukila kotyilongo tyo Moambe nomulume wae novana vae vevali. Etyi pakala, omulume wa Noemii anyimi. Ovana vae vevali avanepe ovakai voko Moambe, oo Luti na Olopa. Pakala vala katutu, ovana va Noemii navo avanyimi.

Etyi Noemii etyiiva okuti ko Isilayeli kutupu vali ondyala, akondoka kotyilongo tyavo. Avaende na Luti na Olopa. Etyi veli mondyila, Noemii evepopila okuti: ‘Onwe ankho muhole ovalume venyi mwandinga okankhenda, ame nahanda munepwe vali. Kondokei ko Moambe.’ Avemutolela okuti: ‘Onthwe tukuhole! Onthwe kamatukuyeke.’ Noemii atolela Olopa na Luti okuti kondokei. Olopa akondoka, mahi Luti ahakondoka. Noemii emupopila okuti: ‘Olopa wakondoka kovanthu votyilongo tyavo, wakondoka kono huku mbavo. Kondoka, endei na mukwenyi, kondoka kovonyoko.’ Mahi Luti ati: ‘Ame himekuyeke. Venyi vakalinga vetu, Huku yove ukalinga Huku yange.’ Mokusoka kwoove oñgeni otyipuka otyo tyakalesile Noemii?

Luti na Noemii vehika ko Isilayeli pokuteya. Nthiki imwe, Luti akapupulula mepia liomulume umwe utiwa o Mboasi, omona wa Laambe. Mboasi eivi okuti Luti omu Moambe ukala na Noemii, umuhole unene. Apopila ovaundapi vae vayeke Luti apupulule mepia liae.

Kongulohi etyi Luti ehika meumbo, Noemii emupulu okuti: ‘Okepia lialie wakaundapele hono?’ Luti apopi okuti: ‘Omepia liomulume  umwe utiwa o Mboasi.’ Noemii emuti: ‘Mboasi ombunga yomulume wange. Pupaulula vala mepia liae novahikwena vakwenyi. Petupu ou mekuleve.’

Luti apupulula umwe vala mepia lya Mboasi atee vamana okuteya. Mboasi etyimono okuti Luti omukai umwe omuwa, uundapa unene. Pononthiki opo, omulume umwe okunkhia ahasi-po ovana, omukai wae unepwa na umwe pombunga yomulume wae. Mboasi avelinepe na Luti. Avakutula omona, avemuluku okuti o Ombende, he mbwale Yohamba Ndaviti. Omapanga a Noemii avahambukwa unene. Avapopi okuti: ‘Tete Siovaa wekwavela Luti ekulingi nawa, pahe wekwavela omutekula. Siovaa ahilivikwe!’