Susuwee wahongolelele ovanthu va Siovaa omanima omanyingi, etyi ena omanima 110 anyimi. Etyi Susuwee ena omwenyo, ova Isilayeli ankho vafenda Siovaa. Mahi etyi Susuwee ankhia, ova Isilayeli avahimbika okufenda ovilolo ngeetyi tyilinga ova Kanaa. Mokonda ova Isilayeli vayekele-po Siovaa, Siovaa ayeke ohamba yova Kanaa itiwa o Sambii ivemonese ononkhumbi. Ovanthu avaiti ku Siovaa opo evekwateseko. Siovaa eveavela omunthu mevehongolela utiwa o Mbalake. Mbalake ankho mevekwatesako vakondoke ku Siovaa.

Omukai umwe omuuli utiwa o Ndembola, atumu vakapopile Mbalake onondaka mba Siovaa mbati: ‘Taindya ovalume 10.000, amukelivasa pondongi Kisoo novakwa-vita vohamba Sambii. Opo mamukalwisila Sisela, onkhalamutwe yovakwa-vita va Sambii.’ Mbalake apopila Ndembola okuti: ‘Ame mandyiende vala, inkha noove wenda.’ Ndembola ati: ‘Ame mandyiende noove. Mahi noñgonoka okuti, have-ko moipaa Sisela. Siovaa wapopia okuti maipawa nomukai.’

Ndembola na Mbalake novakwa-vita avaende Komphunda Tambole opo vakalwe. Etyi Sisela etyiiva, amaneka omatuku-tuku ae ovilwa  tupu amanekesa ovakwa-vita avakala mombwelo yomphunda. Ndembola apopila Mbalake okuti: ‘Hono onthiki Siovaa memukwatesako okuvelwisa.’ Mbalake novalume 10.000 avalauka komphunda opo vahonyene novakwa-vita va Sisela.

Siovaa alingi ehuviso, ondongi Kisoo ayeeta aihandye, omatuku-tuku ovita vya Sisela aanyena monthata. Sisela atuluka ketuku-tuku akahateka. Mbalake novakwa-vita vae avaipaa ovakwa-vita va Sisela, mahi Sisela ahupu! Sisela akaholama mekaka liomukai umwe utiwa o Saele. Saele emwavela omahini, Sisela apwene, etyi alala emuhiki omanda. Saele eliyombeleka, emupapela omphehe potyihina-kutwi, ankhi.

Mbalake akaovola Sisela. Saele alupuka mekaka liae emupopila okuti: ‘Nyingila, endyu utale omulume ukahi nokwovola.’ Mbalake anyingila mekaka avasi Sisela wankhia. Mbalake na Ndembola avankhimaneka Siovaa notyiimbo mokonda wakwatesako ova Isilayeli okulwisa onondyale mbavo. Ova Isilayeli avakala nombembwa omanima 40.