Omihoko 10 vyo Isilayeli viakalele nonohamba ononyingi onondingavivi, mahi Akambe ankho wavilapo vali. Wanepele omukai ondingavivi ankho ufenda otyihuku Mbaale. Enyina liae litiwa o Sesambele. Akambe na Sesambele vahindilile ovanthu ovanyingi okufenda Mbaale, avatumu okwipaa ovauli va Siovaa. Oityi Siovaa alingile? Watumine ondaka komuuli Iliya opo ekeipopile Akambe.

Iliya atolela Ohamba Akambe okuti mokonda yovivi ulinga, ombila kamailoko mo Isilayeli. Ombila aikala umwe omanima etatu tyahaloko, motyilongo amukala ondyala. Siovaa atumu vali Iliya akapopie na Akambe. Akambe ati: ‘Ove wetwetela! Ovipuka evi vikahi nokumoneka mokonda yove.’ Iliya ati: Ame hame-ko naeta ovitateka evi. Ove wahindila ovanthu okufenda Mbaale. Tutalei olie Huku yotyotyili. Twongiyei ovanthu novauli va Mbaale Komphunda Kalumelu.’

Ovanthu aveho avaende komphunda Kalumelu. Iliya apopi okuti: ‘Onwe koyei ou mamufende. Ine Siovaa o Huku yotyotyili oe mufenda. Ine o Mbaale, oe mufenda. Pahe tutalei olie Huku yotyotyili. Ovauli va Mbaale 450 valinge otyilikutila avaihana huku yavo. Ame mandyilingi otyilikutila andyiihana Siovaa. Una wamatumu otupia kotyilikutila, oe o Huku yotyotyili.’ Ovanthu avetavela etyi apopia.

Ovauli va Mbaale avalingi otyilikutila. Avakala umwe onthiki aiho nokwihana huku yavo otyo vati: ‘Mbaale, tukumbulule!’ Mokonda Mbaale kekahi nokuvekumbulula, Iliya eveyolo. Ati: ‘Ihanenei peulu, hamwe ulele. Wesukisa okupahulwa-po.’ Atee kounthiki ovauli va Mbaale otyo vaihana vala. Mahi otyo vahakumbululwa.

Iliya apake otyilikutila tyae komutala, apake-ko omeva. Elikwambela okuti: ‘Siovaa, mbambavo nahanda ovanthu ava vanoñgonoke okuti ove Huku yotyotyili.’ Liwa-liwa Siovaa atumu otupia atuyoko otyilikutila. Ovanthu avapopila peulu okuti: ‘Siovaa o Huku yotyotyili!’ Iliya apopi okuti: ‘Ipaei ovauli aveho va Mbaale!’  Monthiki oyo, ovauli va Mbaale 450 avaipawa.

Iliya amono ekaka atolela Akambe okuti: ‘Kuna nokuya ombila onene. Hateka, kapole okatemba kove, enda keumbo.’ Meulu amuyula omakaka omanthikovei, akufili omphepo imwe onene, ombila aihimbika okuloka. Akambe alondo kokatemba kae ekehatekesa unene. Mokonda Siovaa wakwatesako Iliya, ahateka alambe-po okatemba ka Akambe! Okuti ovitateka vya Iliya viapwile? Tutalei.