O Ninive epunda-umbo likala ko Asilia. Ovanthu vakala-mo ankho valinga ovivi. Siovaa atumu omuuli Sona aye ko Ninive akapopile ovanthu okuti, livelei yekei-po ovipuka ovivi mulinga. Mahi, Sona aende no kotyilongo otyikwavo. Avelama mowato ukahi nokwenda no ko Talisi epunda-umbo likala kokule no Ninive.

Pweetyi owato ukahi nokwenda, akuya omphepo imwe onene, ovatahi vowato avatili unene owoma. Avehimbika okulikwambela kovihuku viavo avati: ‘Olie wetwetela otyitateka etyi?’ Sona ati: ‘Ame napengesa. Ndyikahi nokukahateka mokonda hahandele okulinga etyi Siovaa anthuma. Inkha mundyumba melunga, omphepo maitulu.’ Ovatahi vowato avehetavela, mahi Sona ati ndyumbei-mo vala. Etyi vemuyumba melunga, omphepo aitalama.

Sona ehimbika okunyingila kohi yomaande. Etyi etyimona okuti ukahi nokwenda unene kohi, elikwambela ku Siovaa. Siovaa atumu ombisi imwe onene, aimunyini-po mahi ahankhi. Etyi ekahi meimo liombisi, Sona elikwambela ati: ‘Okuhimbikila hono mandyikutavela apeho.’ Siovaa akalesa Sona meimo liombisi ononthiki ononthatu, pahe aimuhandyela koluhimba.

Etyi Siovaa ayovola Sona, okuti otyo tyilekesa okuti kapondola vali okwenda ko Ninive? Au. Siovaa atumu vali Sona ende ko Ninive. Pahe  Sona etavela. Etyi ehika-ko apopila ovanthu vana onondingavivi ati: ‘Mononthiki 40, o Ninive maihanywa-po.’ Pahe apamoneka otyipuka tyimwe Sona ahasoko, ovanthu vomo Ninive avemutavela, avayeke-po okulinga ovivi. Ohamba yomo Ninive aipopila ovanthu okuti: ‘Twitei ku Huku etwevele. Hamwe ketuhanye-ko.’ Etyi Siovaa amona okuti ovanthu vomo Ninive velivela, ehevehanye-ko vali.

Sona anumana unene mokonda epunda-umbo kaliahanyenwe-po. Soka Siovaa wapwile elundo na Sona, wemulingile okankhenda, mahi Sona ankho utupu okankhenda novanthu vomo Ninive. Sona anumana unene, atundu mepunda-umbo akapumphama mombwelo yolunthanga. Olunthanga olo alukukuta, Sona anumana unene. Pahe Siovaa emupopila okuti: ‘Ove waetehila vali okankhenda olunthanga tyipona ovanthu vomo Ninive. Ame ndyina okankhenda navo, himevehanye-ko.’ Oityi Siovaa ankho ekahi nokulongesa Sona? Ovanthu vomo Ninive vapona polunthanga.