Etyi Ndaviti aipaa Ngoliya, Ohamba Saulu aikoyo Ndaviti opo akalele komutwe ovakwa-vita vae. Ndaviti walwile-lwile novita ovinyingi avitili-ko, ovipuka ovio alingile aviivala kovanthu ovanyingi. Ovakai avaimbi okuti: ‘Saulu waipaa ovityita, Ndaviti waipaa omakwii nomakwii ovityita!’ Otyipuka otyo atyinumanesa unene Saulu ahande okwiipa Ndaviti.

Onthiki imwe etyi Ndaviti eli nokuhika otyisandyi, Saulu ayumbu eonga Ndaviti, Ndaviti ayepe. Okutuka opo, Saulu akalela vala okuyeva Ndaviti opo emwipae. Mokonda Ndaviti ukalela vala okuyewa, akaholama moluhandya.

Saulu aende novakwa-vita 3.000 vakaovole Ndaviti. Saulu anyingila meleva omu mwaholama Ndaviti novanthu vae. Ovanthu ankho vena Ndaviti avemupopila  okuti: ‘Ei onthiki Siovaa apakula ondyale yove pomavoko ove.’ Ndaviti aende, ayombaila atee pu Saulu atete kotyikutu tyae. Saulu ehetyiivi. Otyipuka otyo Ndaviti alinga atyimukala omapita, mokonda kakalele nonthilo nohamba Siovaa aholovona. Ndaviti ahayeke ovakwa-vita vae vaipae Saulu. Ndaviti aihana Saulu ati, onthiki yohono ñgeno nekwipaa. Okuti pahe Saulu kayevele vali Ndaviti?

Au. No ngootyo Saulu kayekele-po okuyeva Ndaviti. Nthiki imwe kounthiki oo Ndaviti notyimphumba tyae Ambisai, avaende monthanda ya Saulu. Aveho vevevasa velele, na Ambinele wokuyunga ohamba nae ankho ulele, Ambisai ati: ‘Eli elao lietu! Eta ndyimwipae.’ Ndaviti emupopila okuti: ‘Siovaa oe mwene maipaa Saulu. Tutyinde-po vala omutunga wae nonthenda yae yomaande, twende.’

O Ndaviti avalondo komphunda ikala popepi nonthanda yo Saulu. Aihana ati: ‘Ambinele omokonda yatyi wahayungilile tatekulu yove, ohamba? Onthenda yae neonga liae vili-pi?’ Saulu aimbuka ondaka ya Ndaviti, ati: ‘Ove ankho upondola okundyipaa, mahi kwandyipaele. Ndyityii okuti ove momphingi kouhamba otumina o Isilayeli.’ Saulu akondoka keumbo liae. Mahi haveho vombunga ya Saulu ankho veyele Ndaviti.