Sonataa, omona wotyiveli wohamba Saulu ankho wakola omutima. Ndaviti watile Sonataa ankho uhateka ngonkhombe, wakola omutima ngonkhulika. Onthiki imwe, Sonataa nomukwatesiko wae avamono ova Filisitiya 20 veli komphunda. Sonataa apopila omukwatesiko wae okuti: ‘Ine ova Filisitiya vetuti endywei tulwe, matwende, mokonda Siovaa mevepakula pomavoko etu.’ Ngatyo umwe ova Filisitiya valinga. Ova Filisitiya avevekwele avati: ‘Endywei, tulwe!’ Oo Sonataa nomukwatesiko wae avalondo komphunda, avatisila ovakwa-vita aveho.

Mokonda Sonataa wali omona wotyiveli wa Saulu, ñgeno oe upinga pu he akala ohamba. Mahi Sonataa ahalu onkhi Ndaviti mokonda utyii okuti, oe Siovaa akoya opo akale ohamba yo Isilayeli. Sonataa  na Ndaviti avakala omapanga omanene. Avalingi omphango, avati tuliamene, tuheliyeke-po. Sonataa aavela Ndaviti otyikutu tyae, nomutunga wae, nonkhondyi yae, nepoha liae.

Etyi Ndaviti akaholama Saulu, Sonataa akaovola Ndaviti emutolela okuti: ‘Kala tyapama, wahatile owoma. Siovaa wekukoya opo ukale ohamba. Na tate utyii.’ Ove kuhande okukala nepanga nga Sonataa?

Sonataa weliyumbilehi umwe opo akwateseko epanga liae. Etyi Sonataa etyimona okuti tate yae Saulu wahanda okwipaa Ndaviti, atolela tate yae okuti: ‘Molingi onkhali inkha wipaa Ndaviti, una utupu etyi ekulinga tyapenga.’ Saulu anumanena unene Sonataa. Etyi pakala, ovo Saulu na Sonataa avaipaelwa kovilwa.

Etyi Sonataa ankhia, Ndaviti aovola omona wa Sonataa utiwa o Mefimbosete. Etyi Ndaviti avasa Mefimbosete emupopila okuti: ‘Mokonda Tate yove ankho epanga liange enene, ame mandyikutekula. Mokala mondywo yange, molia-alia komesa yange.’ Ndaviti kalimbilwe epanga liae Sonataa.