Tyina watila owoma ulinga ñgeni?— Hamwe wenda ku me yove ine oku ho opo vekukuateseko. Mahi kuna vali omunthu omukuavo upondola okukukuatesako. Oe una vali epondolo tyipona ovanthu vatyo aveho. Ove umwii?— Eenga, o Jeova Huku. Matupopi konthele yomukuendye umwe wapopiwa Mombimbiliya utiwa o David. Oe ankho utyii okuti Jeova apeho memukuatesako, moluotyo ankho utupu owoma.

Tunde etyi David nkhele olukembe, ovohe vemulongesile okukala nohole na Jeova. Otyo tyakuatesileko David okuhakala nowoma alo umwe tyina amonekelwa notyipuka tyitilisa owoma. Oe ankho utyii okuti Jeova Epanga liae iya memukuatesako. Nthiki imwe etyi David ankho ekahi nokulisa onongi, pamoneka onkhulika imwe onene aityindipo ongi! Utyii oityi David alingile? Wataatele onkhulika eiipaa nomaoko ae! Iya etyi onongi mbae mbautukililwe nehunyu, tupu David eliipaa! Utyii olie wakuatesileko David?— Eenga, o Jeova.

Pena vali otyikando otyikuavo David alekesile okuti utupu owoma. Ova Isilayeli ankho mavakaluisa ovanthu vatiwa ova Filisteu. Umwe, pomafualali ova Filisteu ankho omule unene, ekihi! Ankho utiwa o Goliya. Ekihi olio ankho likahi nokukuela omafualali ova Isilayeli na Jeova. Ankho lihanda okuveluisa. Mahi, ova Isilayeli aveho ankho vatila owoma. Etyi David etyiiva, wapopila Goliya okuti: ‘Mandyilu noove! Jeova mankhuatesako, mandyikufindi!’ Usoka okuti David watilile owoma?— Au, katilile owoma. Uhanda okunoñgonoka etyi tyamonekelepo?

David watyindile onthuala, nomamanya etatu, akalwa nekihi. Etyi Goliya amona omukuendye David, emukuele. Mahi, David emupopila okuti: ‘Ove uya kuame nomutunga, mahi, ame ndyiya kuove nenyina lia Jeova!’ Iya apake emanya monthuala yae, akahateka noku Goliya, ayumbu. Emanya alimuvete mombamba! Ekihi alitokela pohi, alinkhi!  Ova Filisteu aveho avatili owoma, iya avakahateka. Oñgeni David omukuendye omututu etyivilile okuipaa ekihi?— Jeova wemukuatesileko, mokonda Jeova ankho una vali epondolo tyipona ekihi olio!

Oityi ulilongesila kehipululo lia David?— Jeova una vali epondolo tyipona ovanthu aveho. Iya Epanga liove. Moluotyo, tyina wamakala vali nowoma, hinangela okuti Jeova upondola okukukuatesako okukala nomutima wakola!