Tala omona ou ukahi polutalatu apa. Umoneka ngoti watila owoma, hatyo? Noove weliteheleliale ngotyo?— Ovanthu aveho pamwe velitehelela ngotyo. Ombimbiliya ipopia konthele yomapanga amwe a Jeova vasokele okuti vekahi aveke avatili owoma. Umwe puvo o Eliya. Tulilongese konthele yae.

Eliya ankho ukala mo Isilayeli kohale, puetyi Jesus ehenetyitwe. Akabe, ohamba yo Isilayeli, ankho kafende Huku yotyotyili, Jeova. Akabe nomukai wae Jezabele, ankho vafenda huku yomatutu Baale. Moluotyo, ovanthu ankho vakala mo Isilayeli navo avahimbika okufenda Baale. Onkhai-hamba Jezabele ankho omukalavi unene iya ankho uhanda okuipaa ovanthu aveho vafenda Jeova, okukutikinyamo Eliya! Utyii oityi Eliya alingile?—

 Eliya waile nkholo! Aende kokule aholama meleva. Utyii omokonda yatyi alingila ngotyo?— Eenga, ankho watila owoma. Mahi Eliya ankho kesukisile okutila owoma. Mokonda yatyi? Mokonda ankho Jeova memukuatesako. Jeova wemukuatesilekuale. Nthiki imwe Jeova wakumbululile elikuambelo lia Eliya atumu otupia. Ngotyo, Jeova ankho upondola okukuatesako vali Eliya!

Puetyi Eliya ankho ekahi meleva, Jeova wapopile nae emupulu okuti: ‘Omo ulingamo tyi?’ Eliya akumbulula okuti: ‘Ame vala nahupapo. Ndyike vala, natila owoma mandyiipawa.’ Eliya ankho usoka okuti ovafendi aveho va Jeova vaipawa. Mahi Jeova emupopila okuti: ‘Otyo hatyiliko. Nkhele kuna ovanthu 7.000 vafenda kuaame. Kola omutima. Ndyina vali ovilinga pala ove!’ Usoka okuti Eliya wahambukilwe etyi eiva onondaka ombo?—

Oityi ulilongesila kuetyi tyamonekelele Eliya?— Wahasoke okuti ukahi awike otili owoma. Una omapanga ehole Jeova iya tupu ekuhole. Tupu, Jeova una epondolo enene, iya apeho mekukuatesako! Tyikuhambukiswa okunoñgonoka okuti nalumwe mokala awike?—