Okuti apeho tyapepuka okutavela kovoho?— Pamwe katyapepukile. Utyii okuti Jesus wetavelele apeho ku Jeova no kovohe?— Ongeleka yae ipondola okukukuatesako okutavela kovoho alo umwe tyina tyahapepukile. Tulilongese vali konthele yotyo.

Etyi Jesus eheneye pano pohi, ankho ukala keulu na Tate yae Jeova. Mahi, etyi Jesus eile pano pohi tupu ankho una ovohe. Ankho vatiwa ovo Jose na Maliya. Utyii oñgeni Jesus eya okukala omona wavo?—

Jeova wapola omuenyo wa Jesus keulu, eupake meimo lia Maliya opo Jesus atyitwe akala pano pohi. Olio ankho ehuviso! Jesus wekulilile meimo lia Maliya ngetyi omalukembe omakuavo ekulila meimo lia ina. Etyi palamba onohanyi etyive, Jesus akutulwa. Ongotyo Jesus eya okukala omona wa Maliya nomulume wae Jose pano pohi.

Etyi Jesus ankho ena vala omanima 12, walingile otyipuka tyimwe tyalekesa okuti ankho uhole unene Tate yae Jeova. Otyo tyamonekele etyi Jesus nombunga yae vaile ko Jelusalei Kopasikwa. Etyi ankho vekahi nokukondoka, Jose na Maliya avatale okuti Jesus wesala. Utyii opi ankho ekahi?—

Jose na Maliya avakondoka ko Jelusalei, avaovola Jesus monomphangu ambuho, avehemuvasi, iya avasukalala unene. Mahi, etyi palamba ononthiki ononthatu, avemuvasi mondyuo ya Huku! Utyii omokonda yatyi Jesus ankho aila mondyuo ya Huku?— Omokonda ankho upondola okulilongesilamo konthele ya Tate yae Jeova. Ankho uhole unene Jeova iya ankho uhanda okunoñgonoka oñgeni apondola okumuhambukiswa. Alo umwe etyi ekula, akala omulume omunene, Jesus apeho ankho utavela ku Jeova. Wetavelele alo umwe tyina ankho tyahapepukile, alo umwe tyina ankho tyipondola okumuetela ononkhumbi. Okuti tupu Jesus wetavelele ku Jose na Maliya?— Eenga, Ombimbiliya ipopia okuti wetavelele.

Oityi ulilongesila kongeleka ya Jesus?— Noove wesukisa okutavela kovoho, alo umwe tyina tyahapepukile. Okuti motyilingi?—