Omukainthu ou polutalatu apa umueete?— Omona womulume umwe utiwa o Jefete. Ombimbiliya kaitupopila enyina liae, mahi tutyii okuti wahambukisilue tate yae na Jeova. Matulilongesa konthele yae, na tate yae Jefete.

Jefete ankho omulume umwe ondalawa, iya ankho ulongesa omona wae konthele ya Jeova. Ankho una ononkhono tupu ankho onkhalamutwe ongwa. Moluotyo, ova Isilayeli vemuitile opo evehongolele tyina vamakalwisa onondyale mbavo.

Jefete welikuambelele ku Huku opo evekuateseko okufinda. Jefete walaele okuti inkha vafinda, tyina amakondoka, omunthu wotete malupuka meumbo  liae, memuavela Jeova. Omunthu oo ankho makakala mekaka liefendelo lia Huku, nokuundapamo omuenyo wae auho. Ekaka liefendelo omphangu omu ovanthu ankho vafendela Huku. Jefete wafindile umwe ovilwa! Etyi akondoka meumbo, utyii olie watetekela okulupukamo?—

Eenga, omona wae! Ankho oe vala enae, mahi Jefete ankho una okufuisapo etyi apopile. Otyo tyemuihamene unene. Mahi hinangela, ankho walinga omulao. Liwa-liwa, omona wae ati: ‘Tate, una etyi walaa Jeova, una okutyilinga.’

Omona wa Jefete nae tyemuihamene. Mekaka liefendelo, ankho kapondola okunepwa, nokukala novana. Mahi, ankho uhanda okulinga etyi tate yae alaele, nokuhambukiswa Jeova. Kwe otyo ankho tyakolela vali tyipona okunepwa ine okukala novana. Moluotyo, atundu meumbo, akakala mekaka liefendelo omuenyo wae auho.

Usoka okuti etyi alingile tyahambukisilwe tate yae na Jeova?— Eenga, tyevehambukisilwe! Inkha utavela, nokukala nohole na Jeova ngomona wa Jefete, noove mohambukiswa unene ovoho na Jeova.