ELONGESO 12
Otyimphumba Tya Paulu Ankho Una Omutima Wakola
Matulilongesa konthele yomukuendye umwe wahupisile inanthu. Omukuendye oo ankho otyimphumba tya Paulu. Enyina liae katulii, mahi, tutyii okuti walingile otyipuka tyalekesa okuti ankho una omutima wakola. Uhanda okulilongesa tyo?—
Paulu ankho ukahi mokaleya mo Jelusalei. Wakuatua mokonda yokuivisa konthele ya Jesus. Ovalume vamwe ankho ovakalavi veyele Paulu, moluotyo avelipakelamo okuti: ‘Tuiitei komutumini womafualali opo atume omafualali ae aete Paulu kombonge. Atuveholamena mondyila opo tyina Paulu alamba nomafualali atumuipaa!’
Otyimphumba tya Paulu wapopilile Paulu nomutumini konthele yetyi ovalume ovakalavi ankho vahanda okulinga
Omukuendye umwe otyimphumba tya Paulu eivi etyi ovalume ovo ovakalavi ankho vekahi nokulipakelamo. Oityi alingile? Waile kokaleya eketyipopila Paulu. Etyi amana okupopia, Paulu emutumu eketyipopile onkhalamutwe yomafualali. Usoka okuti ankho tyapepuka kotyimphumba tya Paulu okukapopia nonkhalamutwe yomafualali?— Au, mokonda onkhalamutwe yomafualali ankho omunthu wakolela unene. Mahi otyimphumba tya Paulu katilile owoma akapopia nae.
Onkhalamutwe yomafualali ankho utyii etyi malingi. Aonganeka omafualali alamba po 400 opo ayakulile Paulu! Evetumu vatuale Paulu ko Sesareia kounthiki. Okuti Paulu wehikile nawa?— Eenga, ovalume ovakalavi kavetyivilile okumuipaa! Etyi vahandele kavetyivilile.
Ehipululo eli likulongesa tyi?— Noove upondola okukola omutima ngotyimphumba tya Paulu. Tuesukisa okukola omutima tyina tupopila vakuetu konthele ya Jeova. Okuti mokala nomutima wakola nokutualako okupopia konthele ya Jeova?— Inkha ulinga ngotyo, upondola okuhupisa omunthu.
