ELONGESO 3
Raabe Ankho Una Ekolelo mu Jeova
Tusoke ñgeno tukahi mepundaumbo lio Jerikoo. Epundaumbo olio likahi motyilongo tyo Kanaa, omu muna ovanthu vahafende Jeova. Iya mukala omukai utiwa o Raabe.
Etyi Raabe ankho omona, weivile omahipululo konthele yoñgeni Moisesi ayapulile Elunga Enkhuhu, nokupola ova Isilayeli mo Egitu. Tupu, weivile oñgeni Jeova evekuatesileko okufinda onondyale mbavo. Pahe, weiva okuti ova Isilayeli, vaonga onthanda popepi no Jerikoo!
Raabe waholekele ovalavi mokonda ankho una ekolelo mu Jeova
Motyinthiki tyimwe, ovalavi vevali ova Isilayeli avanyingila mo Jerikoo. Aveya peumbo lia Raabe iya eveyeke vakale meumbo liae. Motyinthiki otyo, ohamba yo Jerikoo aitolelwa okuti mepundaumbo muanyingila ovalavi vevali iya veli meumbo lia Raabe. Moluotyo, ohamba aitumu ovalume vekevekuate. Raabe, aholeka ovalavi iya apopila ovalume vatumwa nohamba okuti: ‘Ovalavi vali muno, mahi pahe vapitale. Inkha muvelandula pehepano, nkhele mupondola okuvevasa!’ Utyii omokonda yatyi Raabe eveholekelele?— Omokonda ankho una ekolelo mu Jeova iya ankho utyii okuti Jeova maavela ova Isilayeli otyilongo tyo Kanaa.
Etyi ovalavi nkhele vehenetunde meumbo lia Raabe, vemulaele okuti tyina epundaumbo lio Jerikoo liameya okuhanyuapo, oe nombunga yae mavahupiswa. Utyii oityi vemutumine okulinga?— Vatile: ‘Kuata epanda eli enkhuhu, oliyendyelesa pondyanena yove. Inkha ulinga ngotyo, aveho vekahi mondyuo yove mavahupu.’ Raabe alingi umwe ngetyi ovalavi vemutuma. Utyii oityi tyamonekelepo?—
Jeova wahupisile Raabe nombunga yae
Etyi palamba ononthiki mbumwe, ova Isilayeli avahimbika okuliseta-seta nepundaumbo, otyo vahapopi natyike. Veliseta nalio otyikando tyike monthiki mokueenda kuononthiki epandu. Mahi, monthiki yapanduvali, avelisete nepundaumbo ovikando epanduvali. Iya aveho aveliyavela. Jeova atokesa ovimato viepundaumbo. Mahi, ondyuo ankho ina epanda enkhuhu liayendyelela pondyanena, ayahatoko! Uyeete polutalatu?— Raabe nombunga yae vahupisilwe!
Oityi ulilongesila ku Raabe?— Raabe wakalele nekolelo mu Jeova mokonda yovipuka aviho oviwa elilongesile konthele yae. Noove ukahi nokulilongesa ovipuka ovinyingi oviwa konthele ya Jeova. Okuti noove una ekolelo mu Jeova nga Raabe?— Tutyii okuti una!
