ELONGESO 2
Rebeka Ankho Uhanda Okuhambukiswa Jeova
Rebeka ankho omukai umwe uhole Jeova. Omulume wae ankho utiwa o Isake. Nae ankho uhole Jeova. Oñgeni Rebeka velivasa na Isake? Oñgeni Rebeka alekesile okuti uhanda okuhambukiswa Jeova? Tulilongese vali konthele yae.
Isake ankho omona wa Abraiau na Sara. Ankho vakala mo Kanaa, motyilongo ankho muna ovanthu vahafende Jeova. Mahi Abraiau ankho uhanda omona wae anepe omukai ufenda Jeova. Moluotyo, atumu omupika wae, Eliezer opo akaovolele Isake omuhikuena kotyilongo tyitiwa Haraa, ankho kukala ombunga imwe ya Abraiau.
Rebeka ankho wafuapo pala okutapelela omakamelu omeva
Eliezer waile novapika ovakuavo va Abraiau. Ankho okokule. Moluotyo, vaile nomakamelu atyinda okulia novipuka pala okuava. Ankho oñgeni Eliezer metyivili okuholovona omukai pala Isake? Etyi Eliezer novaundapi ovakuavo vehika ko Haraa, avatulu ponyombo mokonda Eliezer ankho utyii okuti ovanthu maveya okutapa omeva. Elikuambela ku Jeova, ati: ‘Inkha ndyiita omeva komuhikuena umwe iya amphe, tupu aavela omakamelu ange, mandyinoñgonoka okuti oe omuhikuena waholovona.’
Apakala vala katutu amono omuhikuena Rebeka uya no ponyombo. Ombimbiliya ipopia okuti ankho omuwa unene. Eliezer emuiti omeva okunwa iya Rebeka ati: ‘Ewaa. Mandyitape omeva pala ove nomakamelu ove.’ Nkhele soka! Omakamelu tyina aliwa nohunga anwa unene, moluotyo Rebeka watapele ehimbwe. Tala polutalatu, utyeete etyi ekahi nokuundapa unene?— Eliezer wahuvile unene nonkhalelo Jeova akumbululile elikuambelo liae.
Eliezer aavela Rebeka ovipuka ovinyingi oviwa. Rebeka evekongo opo vende nae keumbo lio tate yae. Etyi vehika, Eliezer apopi omokonda yatyi Abraiau emutumina, noñgeni Jeova akumbulula elikuambelo liae. Ombunga ya Rebeka aihambukwa unene, aimuyeke akanepwe na Isake.
Rebeka waile na Eliezer ko Kanaa akanepwa na Isake
Usoka okuti Rebeka wetavelele okukanepwa na Isake?— Rebeka ankho utyii okuti o Jeova watuma Eliezer. Moluotyo, etyi ombunga yae yemupula inkha uhanda okuenda ko Kanaa opo akanepwe na Isake, akumbulula okuti: ‘Eenga ndyihanda.’ Pakala vala katutu Rebeka aende na Eliezer. Etyi vehika ko Kanaa, anepwa na Isake.
Mokonda Rebeka walingile etyi Jeova ankho ahanda, Jeova emuyambe. Etyi palamba omanima omanyingi, mombunga yae ngamo mutuka Jesus! Inkha uhetekela Rebeka ohambukiswa Jeova, noove Jeova mekekuyamba.
