ELONGESO 5
Samuele Watuaileko Okulinga Etyi Tyaviuka
Samuele wahimbika okuundapa mekaka liefendelo tunde pouna, tupu ankho omo akala. Ekaka liefendelo omphangu omu ovanthu ankho vafendela Jeova. Utyii oñgeni Samuele akakala mekaka liefendelo? Tete, tulilongese konthele ya Ana, me ya Samuele.
Tunde kohale, Ana ankho uhanda unene okukala nomona, mahi ankho utupu olutyito. Moluotyo, welikuambelele ku Jeova emuiti opo emukuateseko. Alae okuti inkha ukala nomona, memuave opo akakale mekaka liefendelo. Jeova akumbulula elikuambelo liae, iya akutula omona omukuendye. Emuluku okuti o Samuele. Iya ngetyi Ana alaele, etyi Samuele ankho ena omanima etatu ine ekuana, emutuala mekaka liefendelo opo akaundapele Huku.
Eli ankho omunene-nakwa mekaka liefendelo. Ovana vae vevali ankho navo omo vaundapa. Hinangela okuti mekaka liefendelo omo ankho mufendelwa Huku, iya ovanthu vakalamo ankho vena okulinga ovipuka oviwa. Mahi, ovana va Eli ankho valinga ovipuka ovivi unene. Samuele ankho utyii. Mahi, okuti Samuele nae ankho ulinga ovipuka ovivi ngovana va Eli?— Au, watuaileko okulinga etyi tyaviuka, ngetyi alongesilwe novohe.
Kuove, oityi Eli ankho ena okulinga konthele yovana vae vevali?— Ñgeno weveviyulile, nokuheveyeke vali vaundape mondyuo ya Huku. Mahi, Eli kalingile ngotyo, moluotyo, Jeova anumana unene nae novana vae vevali. Jeova atokola okuvehitisa.
Samuele upopila Eli onondaka mba Jeova
Motyinthiki tyimwe, Samuele ankho ulele, eivi omunthu ukahi nokumuihana, okuti: ‘Samuele!’ Akahateka noku Eli, mahi Eli ati: ‘Ame hekuihanene.’ Etyilingi vali ovikando vivali. Potyikando tyatatu, Eli apopila Samuele okuti inkha wiiva vali ondaka ikuihana, una okukumbulula okuti: ‘Yoo, Jeova upondola okupopia, ndyikuivite.’ Samuele etyilingi. Iya Jeova apopila Samuele okuti: ‘Popila Eli okuti mandyihitisa ombunga yae mokonda yovipuka ovivi valinga.’ Usoka okuti ankho tyapepuka Samuele okukapopila Eli onondaka ombo?— Au, ankho katyapepukile. Mahi, namphila Samuele ankho atila owoma, walingile etyi Jeova emutuma. Jeova alingi umwe ngetyi apopile. Ovana va Eli avaipawa, iya Eli nae ankhi.
Samuele ongeleka ongwa pala onthue. Watuaileko nokulinga etyi tyaviuka namphila ankho ekahi pokati kovanthu valinga ovivi. Iya ove? Okuti mohetekela Samuele, nokutualako okulinga etyi tyaviuka? Inkha ulinga ngotyo, mohambukiswa Jeova, novoho.
