ELONGESO 13
Timoteo Ankho Uhanda Okukuatesako Ovanthu
Timoteo ankho uhambukwa tyina akuatesako vakuavo. Waile kovilongo ovinyingi pala okukakuatesako vakuavo. Mokonda yotyo, wakalele nehambu enene momuenyo. Okuti uhanda okunoñgonoka vali konthele yotyo?—
Ina kulu ya Timoteo na me yae, vemulongesile konthele ya Jeova
Timoteo wekulilile mepundaumbo limwe litiwa Listra. Puetyi ankho omututu, ina kulu Loide na me yae Eunise, vemulongesile konthele ya Jeova. Etyi Timoteo ekula ankho uhanda okukuatesako vakuavo okulilongesa konthele ya Jeova.
Puetyi Timoteo ankho nkhele omukuendye, Paulu wemuitile valinge nae oungendi opo vakaivise kovilongo ovikuavo. Timoteo ati: ‘Ewaa!’ Ankho wafuapo pala okukakuatesako vakuavo.
Timoteo waile na Paulu mepundaumbo lio Tesalonika mo Masedonia. Opo vehikeko, vaendele ehimbwe konomphai, konyima avaendela mowato. Etyi vehika, avakuatesako ovanthu ovanyingi okulilongesa konthele ya Jeova. Mahi, ovanthu ovanyingi vevenumanenene, avahande okuveveta. Moluotyo, Paulu na Timoteo avatundumo, avakaivisa kovilongo ovikuavo.
Timoteo wakalele nehambu enene
Etyi palamba onohanyi mbumwe, Paulu apopila Timoteo opo akondoke ko Tesalonika akatale oñgeni ovakuatate vekahi. Ankho tyesukisa okukola omutima pala okukondoka vali kepundaumbo olio ankho lina ovanthu ovakalavi! Timoteo waile mokonda ankho wasukalala novakuatate ankho vakalamo. Etyi akondoka ku Paulu emupopila ovipuka oviwa. Ovakuatate mo Tesalonika ankho vekahi nawa!
Timoteo waundapele na Paulu omanima omanyingi. Paulu wahonekele okuti Timoteo ankho omunthu omuwa apondola okutuma opo akakuateseko omawaneno. Timoteo ankho uhole Jeova tupu ankho uhole ovanthu.
Okuti ove uhole ovanthu iya uhanda okuvekuatesako okulilongesa konthele ya Jeova?—Inkha ulinga ngotyo, mokala nehambu enene momuenyo, nga Timoteo!
