ELONGESO 11
Vahoneka Konthele ya Jesus
Weete ovalume ava polutalatu?— O Mateusi, na Marku, na Luka, na João na Petulu, na Tiaku, na Juda, na Paulu. Ovalume ava aveho vakaleleko pomuvo wa Jesus, iya vahoneka konthele ya Jesus. Tulilongese vali konthele yavo.
Oityi wi konthele yovalume ava?
Povalume ava vokuahoneka konthele ya Jesus, vetatu vaivisile na Jesus. Uvei ovalie?— O Mateusi, na João na Petulu. Apostolu Mateusi na João ankho vei nawa Jesus, iya aveho vahoneka omukanda upopia konthele yomuenyo wa Jesus. Apostolu João nae wahonekele omukanda utiwa Revelação nomikanda vitatu viihanwa okuti omukanda Wotete wa João, no Wavali wa João, nowa Tatu wa João. Apostolu Petulu wahonekele omikanda vivali vikahi Mombimbiliya. Viihanwa okuti omukanda Wotete wa Petulu no Wavali. Momukanda wae wavali, Petulu wahonekamo konthele yomuvo Jeova apopilile keulu konthele ya Jesus okuti: ‘Ou omona wange. Ame ndyimuhole, tupu nemupanda.’
Ovalume ovakuavo vekahi polutalatu, navo vetulongesa konthele ya Jesus momikanda vahoneka. Umwe puvo o Marku. Tyafuile ankho opo ekahi etyi Jesus akuatelwe, amono atyiho tyamonekelepo. Omukuavo o Luka. Oe ankho ondotolo iya tyafuile wakala Omukristau konyima yononkhia mba Jesus.
Vevali povahoneki Vombimbiliya weete polutalatu, onondenge mba Jesus. Omanyina avo weei?— Ovo Tiaku na Juda. Potete, kavetavelele Jesus. Alo umwe vasokele okuti Jesus utupu onondunge. Mahi, konyima avakala nekolelo mu Jesus iya avakala Ovakristau.
Omuhoneki Wombimbiliya wahulililako weete polutalatu, o Paulu. Etyi ehenekale Omukristau, ankho utiwa o Saulu. Ankho omukalavi unene iya uyele Ovakristau. Utyii oñgeni Paulu akala Omukristau?— Nthiki imwe, Paulu ankho ukahi nokulinga oungendi, eivi omunthu umuihana uli keulu. Ankho o Jesus! Apulu Paulu okuti: ‘Omokonda yatyi umonesila emone vana vetavela kuame?’ Konyima yotyo, Paulu apiluluka akala Omukristau. Paulu wahoneka omikanda 14 Viombimbiliya, okuhimbikila mu Romanos alo Hebreus.
Onthue tutanga Ombimbiliya ononthiki ambuho, ine katutange?— Okutanga Ombimbiliya tyitukuatesako okunoñgonoka ovipuka ovinyingi konthele ya Jesus. Okuti uhanda okulilongesa vali konthele ya Jesus?—
