Ku vana vehole Jeova Huku, Nondaka yae Ombimbiliya:

Jesus wapopile okuti: “Mamukanoñgonoka otyili, iya otyili atyikemuyovola.” (João 8:32) Soka oñgeni ove welitehelele etyi wavasa otyili tyo Mbimbiliya otyikando tyo tete! Wahambukilwe okuanoñgonoka okuti mouye uno weyula omatutu, onthue tupondola okunoñgonoka otyili. — 2 Timóteo 3:1.

Jeova Huku uhanda tunoñgonoke otyili. Iya mokonda tuhole ovanthu, tuhanda okuvepopila konthele yotyo. Mahi pena vali ovipuka ovikuavo tuna okulinga. Tuna okulinga atyiho tuvila opo tukale Ovakristau votyotyili mokonda tuna onthilo nonondonga mba Jeova. Jesus wapopile onkhalelo yakolela onthue tupondola okulekesa okuti tuhole Huku. Wati: “Inkha mutavela ovitumino viange, mamutualako okukala mohole yange, ngetyi ame ndyitavela ovitumino vya Tate iya andyitualako okukala mohole yae.” — João 15:10.

Jesus tyotyili uhole Tate yae iya ulinga atyiho Tate yae emutuma. Inkha tuhetekela Jesus monkhalelo tutyinda omuenyo wetu, Jeova makala nohole nonthue iya matukala nehambu. Jesus wati: “Inkha muanoñgonoka ovipuka evi, mamukala nehambu inkha muvilinga.” — João 13:17.

Tukevelela okuti omukanda ou maukukuatesako okueendela motyili tyo Mbimbiliya iya okala epanga lya Huku. Tulikuambela opo ohole una na Huku iliyawise iya otualako okukala “mohole ya Huku . . . opo ukapewe omuenyo uhapu.” — Judas 21.