1, 2. Oityi tuna okunoñgonoka konthele ya Satanasi novilulu viae?

MOUYE omupe wa Jeova, omuenyo maukakala omuwa unene. Matukakala nomuenyo omuwa Huku ankho etuhandela. Mahi pehepano, tukahi mouye ukahi nokutuminwa na Satanasi novilulu viae. (2 Coríntios 4:⁠4) Namphila katupondola okuvimona, mahi oko vikahi iya vina epondolo enene.

² Mokapitulu aka, matulilongesa oñgeni tupondola okufuena ku Jeova, no ñgeni matuliyakulila ku Satanasi. Jeova walaa okuti metukuatesako. Mahi, tuesukisa okunoñgonoka ononkhalelo Satanasi novilulu viae vaundapesa opo vetuyondye.

3. Oityi Eliapu lihanda okutulinga?

³ Satanasi wapopile okuti ovanthu vaumbila vala Jeova mokonda uveavela ovipuka oviwa iya mavayekepo okumuumbila inkha vakala novitateka. (Tanga Jó 2:​4, 5.) Tyina omunthu umwe alekesa okuti uhanda okulilongesa konthele ya Jeova, Satanasi novilulu viae vetyiimbuka iya valinga atyiho opo vemutalameke. Vanumana unene tyina omunthu umwe elipakula ku Jeova iya ambatisalwa. Ombimbiliya yeeleka Eliapu  “nonkhulika ikoma, ikahi nokuovola ou maili.” (1 Pedro 5:⁠8) Satanasi uhanda okunyona oupanga wetu na Jeova.  ​—⁠ Salmo 7:​1, 2; 2 Timóteo 3:​12.

4, 5. (a) Oityi Satanasi ehevili okulinga? (b) Oityi tyihangununa ‘okuyala Eliapu’?

⁴ Onthue katuesukisile okukala nowoma na Satanasi, novilulu viae, mokonda Jeova utuyakulila kuvio. Jeova walaa okuti “otyinyingi tyovanthu,” Ovakristau votyotyili, mavakahupa “mononkhumbi ononene.” (Apocalipse 7:​9, 14) Natyike Eliapu lipondola okulinga opo  otyo tyihamoneke-po, mokonda Jeova ukahi nokuyakulila ovanthu Vae.

⁵ Inkha tukala noupanga omuwa na Jeova, Satanasi kametyivili okunyona oupanga oo. Ondaka ya Huku itupopila okuti: “Jeova makala nonwe, putyina mutualako okukala nae.” (2 Crônicas 15:⁠2; tanga 1 Coríntios 10:​13.) Ovanthu va Huku vekolelo vokohale, nga Abele, na Noe, na Sara, na Moisesi, vayalele Eliapu mokutualako okukala omapanga a Jeova. (Hebreus 11:​4-40) Nonthue tupondola okulinga ngotyo. Ondaka ya Huku itupopila okuti: “Yalei Eliapu, opo limutile.” ​—⁠ Tiago 4:⁠7.

6. Oñgeni Satanasi aovola okutunyona?

⁶ Namphila Satanasi etyii okuti Jeova ukahi nokutuyakulila, no ngotyo ulinga ononkhono mbokunyona oupanga wetu na Huku. Hono, Eliapu liovola okutuyondya mononkhalelo ononyingi, iya liundapesa ononkhalelo ombo tunde tya kohale. Omaliva patyi liundapesa?

7. Omokonda yatyi Satanasi aluisila ovanthu va Jeova?

⁷ Apostolu João wahoneka okuti: “Ouye auho ukahi pomaoko ondingavivi.” (1 João 5:​19) Satanasi oe ukahi nokutumina ouye uno wovivi iya tupu uhanda okutumina ovanthu va Jeova. (Miquéias 4:⁠1; João 15:​19; Apocalipse 12:​12, 17) Eliapu lityii okuti litupu vali omuvo omunyingi iya mokonda yotyo lilinga atyiho livila opo lituhindile okuhakala ovakuatyili ku Huku. Ovikando vimwe, Eliapu liovola okutuyondya mononkhalelo tuimbuka, mahi ovikando ovikuavo utyilinga mononkhalelo tuhaimbuka.

8. Oityi kese Mukristau ena okuimbuka?

 ⁸ Mu Efésios 6:​12 tutanga-mo okuti: “Tuna ovilwa ovinene . . . no noandyu onombi keulu.” Kese Mukristau ukahi nokulwa na Satanasi Eliapu, novilulu vialio. Tuna okuimbuka okuti aveho velipakula ku Jeova vekahi movilwa ovio. Momukanda ahonekelele ova Efesu, apostolu Paulu walondolele Ovakristau ovikando vitatu okuti “kalei tyapama.” ​—⁠ Efésios 6:​11, 13, 14.

9. Oityi Satanasi novilulu vaovola okutulinga?

⁹ Satanasi novilulu viae valinga atyiho opo vetuyondye mononkhalelo ononyingi. Mokonda vala katuetavelele okuhongiliyua na Satanasi monkhalelo imwe, otyo katyilekesa okuti katupondola okuyondyua monkhalelo onkhuavo. Eliapu liovola okunoñgonoka omayembelo etu omavi opo liholovone onkhalelo yaviuka yokutuyondya. Mahi onthue katuesukisile okuyondyua, mokonda Ombimbiliya itupopila omaliva Eliapu liundapesa. (2 Coríntios 2:​11; tala Okatoi 31 Konthyulilo Yomukanda.) Onkhalelo imwe liundapesa, oumbanda.

10. (a) Oumbanda oityi? (b) Oñgeni Jeova atala oumbanda?

¹⁰ Oumbanda wakutikinya ovipuka vituala omunthu okupopia novilulu, ngetyi okutapesa, nokutyituka, nokuloa, nokuovola okupopia no vokuankhia. Ombimbiliya itupopila okuti Jeova “uyele” oumbanda iya katupondola okukala noupanga nae inkha tulipaka moumbanda. (Deuteronômio 18:​10-12; Apocalipse 21:⁠8) Ovakristau vesukisa okulityilika ononkhalelo ambuho mboumbanda. ​—⁠ Romanos 12:⁠9.

11. Okupanda oumbanda tyipondola okututuala kokulinga-tyi?

¹¹ Satanasi utyii okuti inkha tupanda oumbanda, matyimupepukila  okutuyondya. Ononkhalelo ambuho mboumbanda, mbunyona oupanga wetu na Jeova.

12. Oñgeni Satanasi ahanda okuyondya omalusoke etu?

¹² Satanasi ulinga atyiho opo angwangwanese ovanthu. Katutu-katutu wovola okungwangwanesa ovanthu opo vasoke okuti “otyiwa otyivi, iya otyivi otyiwa.” (Isaías 5:​20) Eliapu liyandyanesa olusoke luokuti ovanthu kavesukisile okuhongolelwa no nondonga mbo Mbimbiliya iya tupu lihanda ovanthu vasoke okuti mavakala vali nehambu inkha kavetavela ovitumino vya Huku.

13. Oñgeni Satanasi ahetekelele okungwangwanesa ovanthu?

¹³ Eliva lya Satanasi liokungwangwanesa ovanthu, lihole okukuata ovanthu ovanyingi. Ukahi nokuundapesa eliva olio tunde kohale. Motyikunino tyo Endene, wangwangwanesile Eva etyi emupula, ati: “Okuti tyotyili Huku wati muhaliei komiti aviho vikahi motyikunino?” (Gênesis 3:⁠1) Konyima, pomuvo wa Job, etyi Jeova ankho ekahi no noandyu, Satanasi emupulu okuti: ‘Okuti Job uumbila umwe Huku mokonda umuhole?’ (Jó 1:⁠9) Konyima yetyi Jesus ambatisalwa, Satanasi wahetekela okumuyondya etyi ati: “Inkha umona wa Huku, popila omamanya aa akale onombolo.” ​—⁠ Mateus 4:⁠3.

14. Oñgeni Satanasi angwangwanesa ovanthu konthele youmbanda?

¹⁴ Hono, Satanasi utualako okungwangwanesa ovanthu. Uhanda ovanthu vasoke okuti oumbanda hatyipuka otyivi mokutyilekesa mononkhalelo mbumwe ovanthu vahaimbuka. Alo umwe Ovakristau vamwe  navo vayondyua neliva olio. (2 Coríntios 11:⁠3) Ngotyo, oityi tupondola okulinga opo tuliyakulile? Oñgeni tupondola okukala nonthumbi yokuti katukahi nokuyondyua nomaliva a Satanasi? Matulilongesa ononkhalelo onombali Satanasi apondola okutuyondya: movitalukiso, nonkhalelo tuhakulwa.

15. Oñgeni ovitalukiso vietu vipondola okutupaka kumwe novilulu?

¹⁵ Hono, mo nosinema ononyingi, mo novidiu, no motelevisau, novitalukiso vyo mo kombutadole, no mo internete, mulekeswa ovipuka vielikuata noumbanda. Ovanthu ovanyingi vasoka okuti ovipuka ovio vikahi nawa iya kavaimbuka otyiponga tyokuyeka ovilulu vinyingile momuenyo wavo. Tupu, ovanthu vapondola okulipaka novilulu tyina valinga ovipuka vimwe, ngetyi okutala ko nonthungululu, nokutala peke, no momikanda iya nokuundapesa ombola yokutapesa. Eliapu lilinga ovipuka ovio monkhalelo ovanthu vahaimbuka okuti ovipuka ovio otyiponga iya avevitale ngatyina oviwa unene ine viyolesa. Omunthu alo umwe upondola okusoka okuti upondola okutala ovipuka vielikuata noumbanda, mahi tyakolela okuhelipake novilulu. Omokonda yatyi olusoke olo luapenga? ​—⁠ 1 Coríntios 10:⁠12.

16. Omokonda yatyi tuna okulityilika ovitalukiso vilekesa oumbanda?

¹⁶ Satanasi novilulu kavetyivili okutala momalusoke etu. Mahi vapondola okutala etyi tuhanda, nonkhalelo tusoka momatokolo tulinga, okukutinyamo ovitalukiso tuholovona. Inkha tuholovona onosinema, noviimbo,  ine omikanda vipopia konthele yokutapesa, noumbanda, novanthu vena ovilulu, novanthu vatyituka, Satanasi novilulu viae mavaimbuka okuti onthue tuhanda okunoñgonoka vali ovipuka ovio. Mavaovola okutupaka vali unene moumbanda. ​—⁠ Tanga Gálatas 6:⁠7.

17. Oñgeni Satanasi apondola okuundapesa ehando tuna liokukala nekongoko ewa opo etuyondye?

¹⁷ Satanasi tupu upondola okuundapesa ehando lietu liokukala nekongoko ewa opo etuyondye. Hono, ovanyingi vamona ononkhumbi mokonda yokuvela. Hamwe omunthu waovola-le okuhakulwa mononkhalelo ononyingi, mahi no ngotyo utualako nokuvela.  (Marcos 5:​25, 26) Upondola okukala tyihena ekevelelo iya alingi atyiho opo akale nawa. Mahi, mokonda tuvanthu va Huku, tuesukisa okulunguka opo tuhaovole ononkhalelo mbokuhakulwa mbelikuata “noumbanda.” ​—⁠ Isaías 1:⁠13.

18. Ononkhalelo patyi mbokuhakulwa Omukristau esukisa okulityilika?

¹⁸ Mo Isilayeli yokohale, ovanthu vamwe ankho “ovimbanda.” Jeova evepopila okuti: “Tyina muyelula omaoko enyi, ame ndyihininika. Namphila mulinga omalikuambelo omanyingi, ame himutehelela.” (Isaías 1:​15) Soka ku etyi: Jeova alo umwe ankho katehelela omalikuambelo avo! Onthue katuhande okulinga natyike tyipondola okunyona oupanga wetu na Jeova, mokonda inkha tutyilinga kametukuatesako. Pahe soka vala okukala tyihena ekuateso lya Jeova tyina tuavela! (Salmo 41:⁠3) Ngotyo, tuesukisa okutala nawa inkha onkhalelo tuhanda okuhakulwa yelikuata noumbanda. (Mateus 6:​13) Inkha tutala okuti hamwe yelikuata noumbanda, tuna okulityilika okuhakulwa monkhalelo oyo! ​—⁠ Tala Okatoi 32 Konthyulilo Yomukanda.

19. Oityi Eliapu lilinga opo ovanthu vakale nowoma nalio?

¹⁹ Vamwe vasoka okuti Eliapu novilulu kaviko, mahi ovakuavo vetyii nawa mokonda yetyi tyaendele momuenyo wavo. Ovanthu ovanyingi vena owoma wovilulu, ovapika voviso viovilulu. Ovakuavo vakalesa ovanthu nowoma wovilulu mokuyandyanesa omahipululo ovipuka ovivi ovilulu vilinga ovanthu. Ovikando ovinyingi, ovanthu vehole omahipululo oo. Omahipululo oo apeho akalesa ovanthu nowoma we Liapu.

20. Oñgeni tupondola okuyandyanesa omatutu a Satanasi?

 ²⁰ Soka ku etyi: Satanasi uhanda ovanthu vakale nowoma nae. (2 Tessalonicenses 2:​9, 10) Satanasi utyii oñgeni apondola okuhongiliya omalusoke ovanthu vehole oumbanda iya uhanda ovanthu ovo vetavele komatutu ayandyanesa. Ovanthu ovo, hamwe vapopia ovipuka vamona ine veiva. Tyina ovanthu vayandyanesa omahipululo oo, vayawisa-ko ovipuka vimwe. Onthue katuhande okukuatesako Satanasi okuyandyanesa owoma ovanthu vena nae, mokupopia omahipululo oo konthele yovilulu. ​—⁠ João 8:​44; 2 Timóteo 2:⁠16.

21. Omatompho patyi tuna okukala nao opo tuhayandyanese omahipululo ovilulu?

²¹ Inkha umwe povanthu va Jeova wakalele novitateka mokonda yovilulu, kapondola okupopia omahipululo oo opo ayolese vakuavo. Ovanthu va Jeova kavesukisile okukala nowoma netyi Eliapu, novilulu vialio vipondola okulinga. Mahi, onthue tuyumba onthumbi mu Jesus, no mepondolo Jeova emuavela. (Hebreus 12:⁠2) Jesus ankho kapopi omahipululo ovilulu ko valongwa vae. Ankho wasukalala vali unene nokupopia konthele Youhamba, no konthele “yovilinga ovinene vya Huku.” ​—⁠ Atos 2:​11; Lucas 8:⁠1; Romanos 1:​11, 12.

22. Oityi ove watokola okulinga?

²² Tuhalimbueiko okuti Satanasi uhanda okunyona oupanga wetu na Jeova iya malingi atyiho evila opo etyivile. Mahi twii nawa omaliva aundapesa iya tuatokola okulityilika ononkhalelo ambuho mboumbanda. Onthue “kamatuavela Eliapu omphitilo” opo lisoyese etokolo tualinga. (Tanga Efésios 4:​27.) Ngotyo, inkha tuyala Eliapu, matuyovoka komaliva alio iya Jeova metuyakulila. ​—⁠ Efésios 6:​11.