“Onwe muna okukala ovalongesi.” (Heb. 5:12) Nkhele soka! Jeova, Omulongesi wavilapo mouye auho, utukonga opo tulongese vakuetu konthele yae! Kese tyilinga tuapewa tyokulongesa otyili konthele ya Jeova, tyilinge o mombunga, o mewaneno, no movilinga viokuivisa, elao limwe enene iya tyakolela unene okutyifuisapo. Oñgeni matutyivili okutyifuisapo nawa?

Ekumbululo tulivasa monondaka apostolu Paulu ahonekelele Timotiu, mbati: “Tualako okulinga ononkhono mbokutangela mounyingi, nokuviyula, nokulongesa.” Paulu ayawisako okuti: “Okulinga ngotyo, moliyovola ove muene na vana vekutehelela.” (1 Tim. 4:13, 16) Ove una onondaka mbuyovola ovanthu. Otyo wesukisila okulinga ononkhono mbokutanga nokulongesa monkhalelo ikahi nawa. Ombulusula ei yalingwa opo ikukuateseko okutyilinga. Tala oñgeni ombulusula ei yaonganekwa.

Jeova “Omulongesi Wavilapo.” (Isa. 30:20) Namphila ombulusula ei maikukuatesako okuyawisa kounongo wove wokutanga nokulongesa nawa, mahi wahalimbueko okuti Jeova oe Ondyivi-ndyivi yetyi tulongesa iya oe ukokela ovanthu kwe. (João 6:44) Ngotyo, apeho likuambela okuita ospilitu sandu. Undapesa apeho Ondaka ya Huku. Ovola okunkhimaneka Jeova, uhelinkhimaneke ove muene. Linga ononkhono mbokukuatesako ovateheleli vove okukala nohole na Jeova.

Ove wakongua opo ulongese onondaka mbakolela unene mba Huku. Tuna onthumbi yokuti motyivili okufuisapo nawa otyilinga otyo, putyina utualako okuyumba onthumbi “mononkhono Huku aava.” — 1 Pet. 4:11.

Ovalongesi vakuenyi,

Ononkhalamutwe mbo Nombangi mba Jeova