EPULO 3
Oñgeni Mandyikala Noupanga Omuwa no Votate?
OITYI UNA OKULINGA?
Soka kuetyi: Omutatu kounthiki. Pedro una omanima 17, wamana okulinga ovilinga vio peumbo pahe uhanda okupululukwa! Ulikala o televisau alangalapo kotyipundi.
Tate yae ayingila nokuanumana.
“Pedro! Omokonda yatyi umanena omuvo nokutala o televisau ohakuatesako omphange yove una ovilinga? Ove apeho kutavela okutumwa!”
“Au, nkhele ndyipopiwa vali,” utyipopila peulu opo vemuive.
He umutala apulu okuti: “Oityi wapopia kamukuendye?”
Upuka komutwe ati “natyike, Tate.”
Pahe Tate yae wanumana. “Wahapopie naame ngotyo.”
Inkha ove Pedro, oityi ñgeno walinga opo muhakale notyitateka?
TALAMA IYA OSOKO!
Okutomphola no tate yove tyelifwa nokutaha etuku-tuku. Inkha uvasa otyipuka metapalo kukondoka ohaende vali oku wapanga, mahi wenda no ketapalo ekuavo.
ONGELEKA:
Omuhikuena umwe utiwa Lea wati: “Ame hityivili okutomphola na Tate. Pamwe tyina ndyikahi nokumupopila otyipuka tyimwe amphulu okuti, ‘otyiponyo ukahi nokupopia naame?’”
POVIPUKA EVI VITATU LEA UPONDOLA OKUHOLOVONA-PO TYIKE.
-
Okuyaya na tate yae.
Lea upopila peulu “tate tehelela! Otyipuka etyi tyesukisa!”
-
Okuyekapo okupopia na tate yae.
Lea uyekapo okupopia konthele yovitateka viae.
-
Ukevela otyikando otyikuavo opo apopie na tate yae.
Lea utomphola na tate yae otyikando otyikuavo ine uhonekela omukanda tate yae apopimo otyitateka tyae.
Pononthele ombu oipi ove uholovonena Lea?
NKHELE SOKA: Tate ya Lea watalukwa, iya kaimbukile esuka-suka liomona. Ngotyo inkha Lea uholovona o A, tate yae kemetyinoñgonoka omokonda yatyi ekahi nokupopila peulu. Okuiholovona katyikuatesako tate ya Lea okumutehelela, Lea malekesa okuti utupu onthilo na tate yae. (Efésios 6:2) Onthele ei kaikuatesako.
Tyelifwa novipuka uvasa metapalo, tupu nove upondola okuovola onkhalelo onkhuavo yokukala nombembwa no tate yove
Namphila onthele B ngoti oyo yapepuka vali, mahi hayoko yaviuka. Omokonda yatyi? Mokonda opo etyivile okutetulula otyitateka tyae, Lea wesukisa okutomphola na tate yae, iya tate yae wesukisa okunoñgonoka etyi tyikahi nokueenda nomona wae. Okuhatomphola kamatyivekuatesako.
Onthele C, Lea kamayeke ovitateka viokosikola vimoneke ngoti kavivilwa okutetuluwa. Ngotyo wovola okutomphola na tate yae otyikando otyikuavo. Iya inkha utokola okuhonekela tate yae omukanda, tyipondola pahe Lea melitehelela nawa.
Okuhoneka omukanda tupu tyipondola okumukuatesako okupopia etyi ahanda okupopia. Tyina tate yae atanga omukanda, makala ngatyina ekahi nokutehelela Lea aimbuka etyi ankho ahanda okumupopila. Onthele C ikuatesako Lea na tate yae. Okutomphola ine okuhoneka omukanda, okulandula onondonga ombu mbo Mbimbiliya mbati “tuovolei okulinga ovipuka vieta ombembwa.”—Romanos 14:19.
Oityi vali Lea ankho apondola okulinga?
Soka etyi ankho apondola vali okulinga otyihoneka pombuelo. Pahe osoko etyi ñgeno tyaeta.
LITYILIKA ONOMPHINGAHANA
Hinangela okuti, ha peho etyi upopia ovo tate yove mavetyinoñgonoka.
MONGELEKA:
Ovoho vekupula omokonda yatyi wanumanena. Ove okumbulula okuti, “hihande okupopia konthele yotyo.”
Ngotyo ovotate yove mavanoñgonoka okuti weveti: “Ame himuyumbu onthumbi hipondola okumupopila ovipuka viange. Mandyipopila ovitateka viange omapanga ange, onwe hanueko.”
Soka ñgeno una otyitateka tyimwe otyinene iya ovotate yove avehekukuatesako. Mahi opopi okuti: “Muhesukei ame muene mandyityivili okutyitetulula andyike.”
-
Okuti ovotate yove vapondola okukutehelela?
-
Okuti upondola okukumbulula monkhalelo ikahi nawa?
Hamwe Noove Uhanda
OITYI OVANA VAMWE VASOKA
Oñgeni Ndyipondola Okupopia no vo Tate?
Ine utomphola nawa no tate yove mavekukwatesako.
ONOVIDIU MBOKUANTHINDWA
Oñgeni Mandyitomphola Novo tate?
Oñgeni motomphola nawa novo tate yove tyina wahahande okupopia?
