Soka kuetyi: Tyina Julia elitalela motyilivandyelo, kwe ngoti wanina vala unene. Elipopila okuti: Nahanda ñgeno ndyitepulula kolutu luange, namphila omapanga ae no vohe vemupopila okuti “ukahi nawa.”

Pahe, Julia asoko okulinga ononkhono ononene opo atepulule “onokilu ononthano” kolutu lwae. Asoko okukala ononthiki mbumwe tyihali . . .

Inkha ulitehela nga Julia, oityi wesukisa okulinga?

Katyapengele ove usoke kolupe luove. Tyotyili, Ombimbiliya ipopia nawa konthele yovakai novalume ankho ovawa, ngetyi o Sara na Rakele, na Jose na David, na Abigail. Ombimbiliya ipopia omukai umwe utiwa Abisague okuti ankho “omuwa unene.”​—⁠1 Reis 1:⁠4.

Mahi, ovakuendye ovanyingi kavahambukilwa olupe luavo. Otyo tyipondola okuveetela ovitateka ovinyingi. Nkhele tala:

• Omaovololo amwe alingwa povahikuena 100, 58 veliyava okuti vanina unene, iya 17 kaveliyave.

• Eovololo ekuavo, ovakai 100, 45 vahoka iya vahanda okunina!

• Mokonda yokuhanda okuhoka, ovahikuena ovanyingi vakala nouvela utiwa anorexia, (owoma wokunina) iya avelityilika okulia, otyo tyipondola okuvetuala kononkhia.

 Inkha ulitehela okuti una ouvela oo ine kuhande okulia, ita ukuatesiweko. Popia no votate yove ine omukulu omukuavo uyumba onthumbi. Ombimbiliya yati: “Epanga liotyotyili una ohole omuvo auho, omukuatate watyitua pala okuvatela pomuvo wononkhumbi.”​—Provérbios 17:⁠17.

Tyotyili, mokati komunthu muna otyiwa notyivi. Soka ku Absalau omona wo Hamba David. Ombimbiliya yati:

“Ankho kutupu omulume nawike upopiwa nawa mokonda yolupe lwae . . . ankho petupu etyi akamba.”​—2 Samuel 14:⁠25.

Mahi, omukuendye oo akala nomalityindailo, nonkhi, nokuhakala omukuatyili! Ngotyo, Ombimbiliya kaipopi nawa konthele ya Absalau, mahi, ipopia okuti omulume uhemukuatyili tupu uyele unene vakuavo.

Nehunga ewa Ombimbiliya itulondola okuti:

“Livalekei omunthu omupe.”​—Colossenses 3:⁠10.

“Okufiwa kuenyi, kuhakale kwo kombanda, . . . mahi lifiwisei mokati momutima.”​—1 Pedro 3:​3, 4.

Namphila katyapengele okuhanda okuhiwa, mahi otyipuka tyakolela vali ovituwa viove. Mokueenda kuomanima, vakuenyi mavekupande vali mokonda yovituwa viove oviwa tyipona ouwa wolutu ine olupe! Omuhikuena umwe utiwa Phylicia wati: “Ponthyimbi ovanthu vapondola okupanda olupe luove, mahi etyi mavahinangela vali ovituwa viove oviwa netyi watuwa momutima.”

Okuti apeho unumana mokonda yolupe luove?

Okuti pamwe usoka okupilulula ovipuka vimwe molutu luove?

Ovipuka patyi uhanda okupilulula molutu luove inkha ñgeno utyivila? (Holovona.)

• OULE

• OLUTU

• ONOHUKI

• OTYIVALA

• OTYIPALA

• OLUPE

Inkha wakumbulula okuti yoo omapulo evali otete iya waholovona ovipuka vitatu ine vilamba-po, nkhele tala: Vakuenyi kavekutale monkhalelo yapenga ngetyi ove ulitala. Tupondola okutokela meliva liokulitala monkhalelo yapenga atusuku vali unene nolupe.​—1 Samuel 16:⁠7.