Soka kuetyi: Etyi Katia ahika motyipito pakala vala katutu eivi ondaka konyima yae eimbuka.

Katia tyina aleuka epanga liae Jessica wakuata onongalafua onombali mbaikulwa. Onongalafa ombo mbuna ovikunwa. Jessica atambeka ongalafua ike Katia ati: “Ove kumona vali omututu nkhele wahanu, ine umona?”

Katia uhanda okuanya, mahi Jessica epanga liae. Katia kahande epanga liae lisoke okuti utyopola ovipuka. Tupu, Jessica omunthu omuwa. Inkha ukahi nokunwa, etyi ekahi nokulinga hatyivi unene. Katia elipopila okuti ‘etyi ovikunwa vala, hepangwe.’

Inkha ove Katia, ñgeno walinga ñgeni?

Opo ulinge etokolo no nondunge motyitateka ngotyo, wesukisa okunoñgonoka ovelie. Okulinoñgonoka, okuimbuka oñgeni omutima wove watuwa, netyi una okulinga. Okukala nenoñgonoko olio tyikukuatesako okuliyunga ove muene, tyipona okuyeka vakuenyi vekupopile etyi una okulinga.​—1 Coríntios 9:​26, 27.

Oñgeni upondola okukala no nonkhono ombo mokati kove? Onkhalelo ongwa yokuhimbika, okukumbulula omapulo maalandulako.

Okunoñgonoka ounongo wove, netyi uvila okulinga matyikukuatesako okukala vali nonthumbi.

ONGELEKA YOMBIMBILIYA: Apostolu Paulu wahoneka okuti: “Namphila nehena ounongo wokupopia, ame hatyoko ndyikahi menoñgonoko.” (2 Coríntios 11:⁠6) Mokonda Paulu ankho wanoñgonoka nawa Ovihonekwa, wetyivilile okupama tyina vakuavo vemulola. Kayekele ovipuka ankho ehevili vimusoyese.​—2 Coríntios 10:10; 11:⁠5.

LITALA NAWA OVE MUENE.

Honeka pombuelo ounongo wove ine etyi uvila nawa okulinga.

Pahe honeka ovituwa patyi ove una. (Mongeleka, okankhenda? otyali? okuyumbwa onthumbi? okuhasete?)

Inkha ove uyeka vina uhevili vikuhongolele tyipondola okunyona liwa omuenyo wove, ngetyi elienge inkha pana liahonyena kapapamene lipondola okuhakuluka aliyeke atyiho ankho liakuta.

ONGELEKA YOMBIMBILIYA: Paulu ankho wiimbuka apa ahapamene. Wahoneka okuti: “Ame tyotyili ndyihambukwa novitumino via Huku, ngetyi natuwa mokati kange. Mahi, ndyiivite molutu luange otyitumino otyikuavo tyikahi nokulwa novitumino viomutima wange, nokunthuala ngonkhuatwa.”​—Romanos 7:22, 23.

O kovipuka patyi uhapamene wesukisa okuliyunga?

 3 OITYI NAHANDA OKULINGA?

Okuti upondola okunyingila metuku-tuku opopila omutahi okuti tuende tulisete-sete pomphangu ike alo ongasole ipuamo? Otyo owova, tupu mopeseka!

Otyo tyikulongesa tyi? Okunoñgonoka etyi uhanda okulinga momuenyo wove tyikukuatesako okuheliseta-seta pomphangu ike. Noñgonoka oku uhanda okuenda no ñgeni mohikiko.

ONGELEKA YOMBIMBILIYA: Paulu wahoneka okuti: “Ame hihateka tyihei oku ndyenda nako.” (1 Coríntios 9:26) Paulu ankho kakala tyihetyi etyi malingi nomuenyo wae, mahi ankho usoka kuetyi malingi nokutala oñgeni metyilingi.​—Filipenses 3:​12-14.

LITALA NAWA OVE MUENE.

Honeka pombuelo ovipuka vitatu uhanda okulinga menima maliya.

Inkha utupu onthumbi, mongwa-ngwana. Mokala ngehimbi lipilaulula ovivala, opo ukale nga vakuenyi. Otyo tyilekesa nawa okuti kulii ovelie.

Tyelikalela notyo, tyina tulinga omatokolo elikuata netyi tuhanda, ulekesa ove, ovelie, ohatalela kuetyi vakuenyi valinga.

ONGELEKA YOMBIMBILIYA: Etyi nkhele ankho omukuendye, omuuli Daniele “watokolele momutima wae” okutualako okutavela ovitumino via Huku, alo umwe etyi ankho ayapulwa kombunga yae. (Daniel 1:⁠8) Mokulinga ngotyo, watuaileko okulekesa oelie. Daniele ankho una onthumbi yetyi alinga.

LITALA NAWA OVE MUENE.

Okuti uliyumba onthumbi? Mongeleka: Okuti utavela ku Huku? Inkha utavela, omokonda yatyi? Oityi tyikuavela onthumbi yokuti Huku oko ekahi?

Ove utavela okuti ovitumino via Huku vikuetela ouwa? Inkha utavela, omokonda yatyi?

Okuhulilako, ove uhanda okukala ngatyi? Ngefo litoka komuti alitualwa nomphepo ine uhanda okukala ngomuti wapama tyina upukwa-pukwa notyipepe? Kakatela muetyi utavela, opo ukale ngomuti. Iya otyo matyikukuatesako okukumbulula epulo, Ame, ame lie?