MOMBIMBILIYA yove, oñgeni o Salmo 83:18 yapitiyua? Mo Tradução do Novo Mundo das Escrituras Sagradas oversikulu ei yapitiyua ngetyi: “Opo ovanthu vanoñgonoke okuti, Ove utiwa Jeova, ove vala Omukulami ouye auho.” Ono Mbimbiliya ononkhuavo nambo otyo mbupopia ngotyo. Mahi, mono Mbimbiliya ononyingi enyina lia Huku Jeova velipolamo, avapingiyapo omanyina enkhimano, ‘Tatekulu’ ine ‘Huku’. Mahi, oityi ankho tyina yokuhonekwa poversikulu oyo? O Huku, o Tatekulu ine enyina Jeova?

Oversikulu oyo ipopia konthele yenyina. Melaka lio Hebreu omu muapolwa Onombimbiliya ononyingi, poversikulu opo ankho pahonekwa enyina liae muene. Ankho lihonekwa nono letela ombu, יהוה (YHWH). Melaka lio lunyaneka, enyina olio liihanwa okuti o ‘Jeova’. Okuti enyina liatyo olio limoneka vala mo versikulu ike yo Mbimbiliya? Au. Movihonekwa vio Hebreu, enyina olio livasiwamo ovikando 7.000.

Okuti enyina lia Huku liakolela umue unene? Tala elikuambelo Jesus Kristu alongesa. Elikuambelo olio lihimbika ngetyi: “Tate yetu ukahi keulu, enyina liove lihivilikwe”. (Mateus 6:9) Onthiki imue, Jesus welikuambela ku Huku okuti: “Tate, nkhimaneka enyina liove”. Huku akumbulula okuti: “Ame nankhimanekale enyina liange, iya mandyilinkhimaneka vali”. (João 12:28) Tyotyili, enyina lia Huku lina esilivilo enene. Mahi, omokonda yatyi ovahoneki vamue vapolela enyina olio mono Mbimbiliya mbavo iya avapingiyapo omanyina enkhimano?

Tyimoneka ngoti kuna omahunga evali. Tete, vamue vapopia okuti katyitavela okutumbula enyina lia Huku mokonda katutyii oñgeni ankho kohale litumbulua. Melaka lio Hebreu ankho lihonekwa tyihena ono letela ombu, a,e,i,o,u. Moluotyo, nawike hono upondola okupopia oñgeni ovanthu kohale ankho vatanga enyina eli YHWH. Okuti otyo tyitutyilika okutumbula  enyina lia Huku? Kohale, enyina lia Jesus ngoti ankho litumbulwa okuti Yeshua ine Yehoshua, nawike utyii nawa. Mahi, ovanthu mouye auho vatumbula enyina lia Jesus mononkhalelo mbelikalaila. Kavayekepo okutumbula enyina lia Jesus mokonda vala kavetyii oñgeni ankho litumbulwa kohale. Tupu, inkha wenda kotyilongo otyikuavo, motale okuti enyina liove melaka liotyilongo otyo, veliihena tyityatyo. Otyo tyilekesa okuti namphila katutyii nawa oñgeni enyina lia Huku ankho litumbulwa kohale, katyitutyilika okulitumbula.

Vali, ovanthu vamue vapola enyina lia Huku mo Mbimbiliya, mokonda yoviso vio va Judeu kohale. Ova Judeu ovanyingi ankho vati enyina lia Huku kalipondola okutumbulwa. Ovanthu ovo vanoñgonoka omapita, otyitumino tyo Mbimbiliya tyokuati: ‘Wahatumbule enyina lia Jeova Huku yove tyehena onthilo. Mokonda Jeova mahitisa una utumbula enyina liae tyehena onthilo.’—Êxodo 20:7.

Okuti otyitumino otyo tyailika okutumbula enyina lia Huku nonthilo? Au. Ovahoneki vo Mbimbiliya mo Hebraika (O Testamendu Onkhulu), ankho aveho ovalume vekolelo, vokutavela Ovitumino Huku aavelele ova Isilayeli. Mahi, apeho ankho vatumbula enyina lia Huku. Ovahoneki ovo Vahoneka enyina lia Huku mono Salmu ononyingi ankho mbuimbwa novanthu mefendelo. Jeova alo umue walongesile ovafendeli vae vapopie enyina liae, iya vokuna ekolelo avetavela. (Joel 2:32; Atos 2:21) Moluotyo, ovakristau hono kavayekepo okutumbula enyina lia Huku nonthilo, ngetyi Jesus alingile.—João 17:26.

Ovapitiyi vo Mbimbiliya valinga otyipuka otyivi unene tyokupingiya penyina lia Huku, omanyina enkhimano. Mokonda yotyo valinga, pahe Huku ngoti hamunthu, ngoti ukahi kokule unene. Mahi, Ombimbiliya yavela ondudo ovanthu opo valinge ‘oupanga na Jeova’. (Salmo 25:14) Sokolola kepanga liove uhole unene. Okuti mamukala noupanga wotyotyili inkha ove enyina liae kulii? Tupu, inkha ovanthu kavei enyina lia Huku, Jeova, oñgeni vapondola okukala noupanga wotyotyili nae? Inkha ovanthu kavatumbula enyina lia Huku, tupu, kamavanoñgonoka etyi lihangununa. Enyina lia Huku lihangununa tyi?

Huku muene wapopilile omuumbili wae Moisesi oityi tyihangununa enyina liae. Etyi Moisesi apula enyina lia Huku, Jeova  wemukumbulula okuti: ‘Ame Mandyikala etyi nahanda okukala.’ (Êxodo 3:14) Ombimbiliya ya Rotherham (mo inglês), poversikulu ei yapopia okuti: ‘Ame mandyikala etyi nahanda.’ Otyo tyilekesa okuti Jeova upondola okukala etyi ahanda, opo afuisepo ehando liae.

Sokolola ñgeno ove upondola okulinga atyiho uhanda. Oityi ove ñgeno walinga pala omapanga ove? Inkha umue pomapanga ove wavela unene, ove ñgeno wakala ondotolo iya omuhakula. Inkha omukuavo utupu onombongo, ove ñgeno wakala omuhona opo umukuateseko motyitateka otyo. Mahi, tyotyili, ove utupu epondolo liokukala atyiho uhanda. Atuho tutupu epondolo olio. Mahi, putyina utualako okulilongesa Ombimbiliya, mohuvu okutala oñgeni Jeova akala etyi ahanda opo afuisepo omilao viae. Huku tyimuhambukiswa unene okuundapesa epondolo liae pala okukuatesako vana vemuhole. (2 Crônicas 16:9) Vana vehei enyina liae, kavei ovituwa ovio oviwa via Jeova.

Tyotyili, enyina Jeova lilinga onthele yo Mbimbiliya. Okunoñgonoka oityi enyina olio lihangununa nokulitumbula mefendelo lietu, matyitukuatesako unene okukala noupanga wotyotyili na Tate yetu Keulu Jeova. a