1, 2. Opi tupondola okuvasa etililo liapama hono?

 SOKOLOLA ñgeno ukahi nokueenda mondyila, iya pahe akuya omphepo onene. Eulu lianthikovela, kumoneka omiliakulo nomitetanena ominene. Akuya ombila onene. Ove uhateka okuovola apa mokayuama. Tyina ukatala, ponthele yetapalo pena okandyuo kapama nawa. Kahaloko, muakukuta nawa nokuasukuka. Tyotyili ove ñgeno wahambukua unene okuvasa omphangu ngoyo!

² Hono tukahi momuvo wovitateka ovinene. Ovivi mouye vikahi nokuliyawisa. Mahi pena omphangu imue yapama, omu tupondola okuholama opo tuyakulilwe kovivi. Omphangu yatyo oyo oipi? Tala etyi Ombimbiliya ilongesa: ‘Mandyipopila Jeova okuti: “Jeova ove etililo liange, nomuameni wange. Ove Huku yange, una nayumba onthumbi.’”—Salmo 91:2.

3. Oñgeni Jeova apondola okukala etililo lietu?

³ Sokolola vala! Jeova, Omupakeko watyiho Omutumini wouye, upondola okulinga etililo lietu. Huku upondola okutuamena,  mokonda una epondolo enene tyipona kese munthu, ine kese tyimue tyihanda okutulinga omapita. Inkha tuvahiwa notyivi Jeova upondola okutukuatesako. Oñgeni matulingi Jeova etililo lietu? Tuesukisa okuyumba onthumbi mue. Tupu, Ondaka ya Huku itutolela okuti: Tualeiko okuendela mohole ya Huku. (Judas 21) Tuesukisa okuendela mohole ya Huku, okutualako okupameka oupanga wetu na Tate yetu keulu. Inkha tulinga ngotyo, matukala nonthumbi onene yokuti Jeova etililo lietu neameno lietu. Mahi, oñgeni tupondola okuhimbika oupanga oo?

4, 5. Omononkhalelo patyi Jeova ehole okulekesa okuti una oluembia nonthue?

⁴ Opo tutualeko okuendela mohole iya Huku, tuesukisa okunoñgonoka apeho oluembia Jeova ena nonthue. Sokolola vala onondonga mbo Mbimbiliya ukahi nokulilongesa nombatelo yomukanda ou. Omupakeko watyiho Jeova, walinga o ohi opo ikale eumbo lietu ewa. Wetuavela okulia okunyingi nomaande, nomalumono omanyingi, novinyama, novipuka ovikuavo vali oviwa. Mokonda Huku oe omuhekulu wo Mbimbiliya, watuma okuhonekamo enyina liae novituwa viae. Tupu, Ondaka yae ilekesa okuti Huku watumine Omona wae ehole unene pano pohi, amono ononkhumbi nokuiipawa opo etuyovole. (João 3:16) Ouwa patyi otyali otyo tyetuetela? Tyetuavela ekevelelo liomuenyo omuwa komutue.

⁵ Tupu Huku walinga otyipuka otyikuavo opo tukakale nomuenyo omuwa komutue. Jeova waviaaleka outumini wo keulu, Ouhamba wa Mesiya. Ouhamba oo, apa katutu maukamanako ononkhumbi iya aukapilulula o ohi ino opo ikale omphangu yombembwa. Nkhele sokolola vala! Tupondola okukakala apeho momphangu oyo yombembwa ine opalaisu, nehambu nombembwa. (Salmo 37:29) Tyina nkhele tukevelela, Huku ukahi nokutuavela ehongolelo opo tutyivile okukala nomuenyo omuwa pahetyino. Tupu utuavela elao  liokupopia nae melikuambelo. Ombu, ononkhalelo mbumue Jeova ekahi nokulekesa oluembia kovanthu aveho, no kuove.

6. Oñgeni mopandula oluembia Jeova ena nove?

⁶ Epulo liakolela ove wesukisa okulilinga olieli: Oñgeni mandyilekesa okuti napandula oluembia lua Jeova? Vamue vapondola okukumbulula okuti ame ndyihole Jeova ngetyi oe enthyole. Okuti nove usoka ngotyo? Jesus wati, otyitumino tyavilapo vali kovikuavo otyetyi: ‘Kala nohole na Jeova, Huku yove, nomutima wove auho, nomuenyo wove auho, nonondunge mbove ambuho.’ (Mateus 22:37) Ove tyotyili una yokukala nohole na Jeova. Mahi, ove hamue ulitehelela okuti unale ohole na Jeova. Okuti otyo tyilekesa okuti uhole umue Jeova, nomutima wove auho, nomuenyo wove auho, nonondunge mbove ambuho?

7. Okulitehelela vala okuti uhole Jeova tyatuuka? Tyihangununa.

⁷ Ngetyi Ombimbiliya ilongesa, okukala nohole na Huku, muakutikinya ovipuka ovinyingi. Mahi, namphila okulitehelela okuti uhole Jeova tyesukisa, otyo onthyimbi vala yohole yotyotyili una nae. Onthanga ike vala yepelu yeeta omuti womapelu. Mahi, inkha ove uhanda okulia epelu iya omunthu umue ekuavela onthanga ike yepelu mohambukwa? Au, kuhambukwa! Tupu, okulitehelela vala komutima okuti uhole Jeova katyituuka. Ombimbiliya ilongesa okuti: ‘Ohole na Huku, ihangununa okutavela ovitumino viae. Iya ovitumino viae kavileme.’ (1 João 5:3) Opo ohole yetu na Huku ikale yotyotyili ina yokuavela ovinyango oviwa. Ina yokulekesilwa kovipuka aviho tulinga.—Mateus 7:16-20.

8, 9. Oñgeni tupondola okulekesa ohole nolupandu ku Huku?

⁸ Tulekesa okuti tuhole Huku tyina tutavela ovitumino viae, nokuviundapesa momuenyo wetu. Okulinga ngotyo katyipuilisa. Ovitumino via Huku kavileme. Mokonda vialingwa pala okutukuatesako okukala nomuenyo wombembua,  nehambu. (Isaías 48:17, 18) Inkha tutavela omahongolelo a Jeova, matulekesa ku Tate yetu keulu okuti tuapandula ovipuka aviho ekahi nokulinga pala onthue. Mahi, hono ovanthu vokupandula ngotyo, kavehi. Tuhakalei ovanthu vahapandula, ngetyi tyalingile vamue kononthiki mba Jesus. Onthiki imue, Jesus ankho wavelulile ovanthu ekwi ankho vena ouvela wotyilundu. Mahi, wike vala wakondokele okukapandula Jesus. (Lucas 17:12-17) Tulingei ngauna wapandulile, tuahalingei ngovanthu vana etyive vahapandulile!

⁹ Mahi, ovitumino patyi via Jeova tuesukisa okutavela? Tuelilongesa ovinyingi momukanda ou, mahi matupitulula ovitumino vimue. Okutavela ovitumino via Huku matyitukuatesako okuendela mohole ya Huku.

10. Hipulula omokonda yatyi tyakolela okutualako nokulilongesa konthele ya Jeova Huku.

¹⁰ Okulilongesa konthele ya Jeova tyesukisa opo tulinge oupanga omuwa nae. Okulilongesa konthele ya Jeova  matyitualako apeho. Sokolola ñgeno ove ukahi mohika kounthiki kuatenda unene, iya ukahi nokuunguluka kotupia. Okuti moyeke otupia tunyime? Au, motualako okupakapo ononkhuii opo tuhanyime. Ngetyi ononkhuii mbesukisa opo otupia tutualeko okutema, tupu ‘enoñgonoko lia Huku’ liesukisa opo tutualeko okupameka ohole yetu na Jeova.—Provérbios 2:1-5.

11. Etyi Jesus ankho alongesa tyakalesile ñgeni ovalanduli vae?

¹¹ Jesus ankho uhanda ovalanduli vae vatualeko okupameka ohole yavo na Jeova. Tupu, nokuyawisa ohole yavo motyili tyakolela tyondaka ya Huku. Konyima yetutilo liae, Jesus walongesile ovalongwa vae vevali konthele yomaulo Ombimbiliya afuiswapo momuenyo wae. Atyikalesa ñgeni ovalongwa ovo? Konyima ovalongwa ovo avati: Omitima vietu ankho kaviatokotele etyi ankho apopia nonthue metapalo, okutuhangununina nawa Ovihonekwa?—Lucas 24:32.

12, 13. (a) Oñgeni ohole yovanthu hono ikahi konthele ya Huku no Mbimbiliya hono ikahi? (b) Oityi tuna yokulinga opo ohole yetu yahatende ?

¹² Puetyi ove wahimbika okulilongesa Ombimbiliya, omutima wove kawahimbikile okutokotelwa nehambu, nombili, nohole na Huku? Enga. Ovanthu ovanyingi otyo velitehelela ngotyo. Mahi, pahe etyi tyepuiya okutualako okupameka nokuyawisa ohole oyo. Katuhande okulandula ovituwa viouye. Jesus wapopile okuti: ‘Ohole yovanthu ovanyingi maikatenda.’ (Mateus 24:12) Oityi una yokulinga opo ohole yove na Jeova, nohole no Mbimbiliya yahatende?

¹³ Tualako okulilongesa konthele ya Jeova no ya Jesus Kristu. (João 17:3) Sokolola nawa kuetyi ukahi nokulilongesa Mondaka ya Huku, okulipula okuti: Etyi tyindongesa tyi konthele ya Jeova Huku? Oñgeni matyinkhuatesako opo ndyikale nohole na Jeova nomutima wange auho, nonondunge mbange ambuho, nomuenyo wange auho? (1 Timóteo 4:15) Okusokolola ngotyo, matyikukuatesako okupameka ohole yove na Jeova.

14. Oñgeni elikuambelo malitukuatesako okukala nohole yapama na Jeova?

 ¹⁴ Otyipuka otyikuavo matyikukuatesako okupameka ohole yove na Jeova okulinga apeho omalikuambelo. (1 Tessalonicenses 5:17) Mokapitulu 17 komukanda ou, tuelilongesamo okuti elikuambelo otyali Huku etuavela. Opo oupanga wetu navakuetu upame tuesukisa okutomphola apeho. Tupu, opo oupanga wetu na Jeova upame, tuesukisa okutomphola nae apeho melikuambelo. Tyakolela okulityilika omalikuambelo ahatundu komutima, okuwanawana onondaka. Tuna yokupopia na Jeova ngatyina omona apopia na tate yae ehole. Tupu, tuesukisa okupopia nonthilo nomutima auho, nokupopia otyili. (Salmo 62:8) Okulinga apeho elilongeso lietu muene lio Mbimbiliya, nokulikuambela tyakolela unene mefendelo lietu. Tupu, matyitukuatesako okuendela mohole ya Huku.

15, 16. Omokonda yatyi tutalela otyilinga tyokuivisa Ouhamba wa Huku ngelao nolumono?

¹⁵ Elilongeso lietu muene lio Mbimbiliya, nokulikuambela, ovilinga vimue tupondola okulinga atuike mefendelo lietu. Pahe matutale ovilinga ovikuavo mefendelo lietu tuna yokulinga mounyingi. Ovilinga ovio, okupopila vakuetu etyi tuelilongesa mo Mbimbiliya. Ove wapopilale vakuenyi otyili ukahi nokulilongesa mo Mbimbiliya? Inkha ukahiale nokutyilinga, una elao enene. (Lucas 1:74) Putyina tupopila vakuetu konthele ya Jeova, tukahi nokufuisapo otyilinga tyakolela Ovakristau votyotyili vapewa. Otyilinga tyokuivisa nokulongesa onondaka onongwa Mbouhamba wa Huku.—Mateus 24:14; 28:19, 20.

¹⁶ Apostolu Paulu ankho utala ovilinga viokuivisa ngotyipuka tyakolela unene, eviihana okuti olumono. (2 Coríntios 4:7) Okupopila vakuetu konthele ya Jeova Huku, nehando liae, ovilinga vimue oviwa una yokulinga. Ovilinga ovio, tukahi nokuvilingila Omutumini umue omuwa. Tupu, matukapewa ondyambi onene. Okulipaka movilinga  ovio, mokuatesako ovanthu opo valinge oupanga na Tate yetu keulu, nokuendela mondyila ivetuala komuenyo wahapu! Okuti kuna ovilinga ovikuavo vihambukiswa vali unene ngevi? Tupu, okuava oumbangi konthele ya Jeova no Yondaka  yae, matyiyawisa ekolelo liove nokupameka ohole yove na Jeova. Iya Jeova upanda unene ononkhono ukahi nokulinga. (Hebreus 6:10) Okutualako okulinga ovilinga ovio nombili, matyikukuatesako okuendela mohole ya Huku.—1 Coríntios 15:58.

17. Omokonda yatyi ovilinga viokuivisa Ouhamba wa Huku vialumbanesa hono?

¹⁷ Otyiwa okuhinangela okuti okuivisa Ouhamba wa Huku, otyilinga tyimue tyalumbanesa. Ombimbiliya yati: ‘Ivisa ondaka, kuluminya okulinga ovilinga ovio.’ (2 Timóteo 4:2) Omokonda yatyi okulinga ovilinga ovio tyalumbanesa hono? Omokonda Ondaka ya Huku yati: ‘Onthiki onene ya Jeova ikahi popepi. Ikahi popepi, ikahi nokukanyauka unene.’ (Sofonias 1:14) Enga, onthiki Jeova makamanako ouye uno wovivi, ikahi popepi unene. Ovanthu vesukisa okulondolwa! Vesukisa okunoñgonoka okuti ou omuwo wokuholovona Jeova opo akale omutumini wavo. Onthyulilo maiya ‘kamaisete.’—Habacuque 2:3.

18. Omokonda yati tuesukisila okufenda Jeova Huku kumue no Vakristau votyotyili?

¹⁸ Jeova uhanda tumufende kumue no Vakristau votyotyili. Moluotyo, Ondaka yae Ombimbiliya yati: ‘Tutalei nawa oñgeni matulipameka pokati, nokukala nohole novilinga oviwa. Tuahayekeipo okuenda komaliongiyo, ngetyi vamue vetyiliya okulinga. Anthi, tuliavelei ondundo kese umue na mukuavo, haunene tyina mutala okuti onthiki ikahi popepi.’ (Hebreus 10:24, 25) Okuliongiya novakutate vetu Ovakristau, tyituavela omuwo wokuhivilika nokufenda Huku yetu woluembia. Tupu, tulipameka nokuliavela ondundo na vakuetu.

19. Oñgeni matupameka ohole yetu novakristau mewaneno?

¹⁹ Okuliongiya no vafendeli va Jeova, tyipameka ohole noupanga wetu mewaneno. Tyakolela unene okutala kovituwa oviwa viavakuetu, ngetyi Jeova atala vala kovituwa vietu oviwa. Wahasoke okuti ovakristau vakuenyi kavalingi onkhali. Noñgonoka okuti atuho tukahi nokukula mopaspilitu, iya pamue tulinga oviponyo. (Colossenses  3:13) Okupameka oupanga wove na vana vehole tyotyili Jeova, matyikukuatesako okukula mopaspilitu. Enga, okufenda Jeova kumue novakuatate vetu matyikukuatesako okuendela apeho mohole ya Huku. Oñgeni Jeova ayamba vana vemufenda nekolelo, nokutualako okuendela mohole yae?

20, 21. Omuenyo wotyotyili oityi? Iya omokonda yatyi omuenyo wotyotyili ekevelelo ewa unene?

²⁰ Jeova maavela ovaumbili vae vekolelo ondyambi yomuenyo. Mahi, omuenyo patyi meveavela? Okuti ove una omuenyo pahetyino? Ovanyingi hono, vakumbulula okuti yoo tuna omuenyo. Onthue tufima, tulia, no kunwa, mokonda tuna omuenyo. Iya pamue tyina tuamahambukwa tuti: Ou, oo omuenyo wotyotyili! Mahi, Ombimbiliya ilekesa okuti hono, nawike una omuenyo wotyotyili.

²¹ Ondaka ya Huku itulunda tukakatele momuenyo wotyotyili. (1 Timóteo 6:19) Onondaka ombo mbulekesa okuti omuenyo wotyotyili otyipuka tukevelela okukapewa komutue. Matukakala vala nomuenyo wotyotyili putyina tuamakala ovanthu vehena nkhali, ngetyi Huku etuhandelele ponthyimbi. Putyina o ohi yamakala opalaisu, ovanthu mavakakala nekongoko, nombembwa nehambu liotyotyili. Opo pahe ovanthu mavakakala nomuenyo wotyotyili, omuenyo wahapu. (1 Timóteo 6:12) Olio hekevelelo ewa unene?

22. Oñgeni upondola okukakatelela ‘momuenyo wotyotyili’?

²² Oñgeni tupondola okukakatela momuenyo wotyotyili? Apostolu Paulu wakuatesako ovakristau valinge oviwa, nokukala ovahona vovilinga oviwa. (1 Timóteo 6:18) Otyo, tyilekesa nawa okuti opo tukamone omuenyo wotyotyili, tuesukisa okuundapesa momuenyo wetu otyili tukahi nokulilongesa mo Mbimbiliya. Mahi, okuti Paulu wahandele okuti matukamona omuenyo wotyotyili mokonda yokulinga ovilinga oviwa? Au, mokonda matukapewa vala omuenyo oo, mokankhenda ka Huku. Jeova una ehambu enene liokuavela  ondyambi vana vemuumbila nekolelo. Huku uhanda ove ukakale ‘nomuenyo wotyotyili’. (Romanos 5:15) Omuenyo watyo oo wehambu, nombembwa wapakelua vala vana vekahi nokuendela mohole ya Huku.

23. Omokonda yatyi tyakolela okuendela mohole ya Huku?

²³ Kese umue puonthue wesukisa okulipula okuti: Ndyikahi umue nokufenda Huku ngetyi oe apopia mo Mbimbiliya? Inkha kese nthiki tufenda Huku ngetyi ahanda, tupondola okupopia okuti tukahi mondyila yaviuka. Tupondola okukala nonthumbi yokuti Jeova oe etililo lietu. Jeova makayovola ovanthu vae vekolelo mokueenda kuononthiki mbahulilila mbononkhumbi mbouye uno. Tupu, Jeova meketutuala mouye omupe uhuvisa ukahi pahe popepi. Monthiki oyo, matukahambukwa unene. Matyiketuhambukiswa, okunoñgonoka okuti tualinga eholovono limue ewa! Inkha ulinga eholovono olio pahetyino, mokakala nomuenyo wotyotyili apeho, omuenyo wahapu Jeova ahandela ovanthu tunde kohale!