1. Inkha tufenda Huku monkhalelo yaviuka, ouwa patyi matupoloko?

 JEOVA HUKU uhanda tukale nomuenyo omuwa. Moluotyo, uhanda tutavele ehongolelo etuavela. Inkha tufenda Huku monkhalelo ahanda, matukala nehambu, nokulityilika ovitateka ovinyingi momuenyo. Tupu, metuavela ononkhano onongwa nokutukuatesako. (Isaías 48:17) Anthi, kuna onongeleya ononyingi, mbupopia okuti mbulongesa otyili konthele ya Huku. Mahi, ovipuka mbulongesa konthele ya Huku netyi ahanda kuonthue, tyelikalela unene.

2. Oñgeni matunoñgonoka onkhalelo yaviuka yokufenda Jeova? Ongeleka patyi itukuatesako okuimbuka nawa ongeleya yotyotyili?

² Oñgeni monoñgonoka onkhalelo yaviuka yokufenda Jeova? Kusukisa okulilongesa omalongeso onongeleya ambuho, opo utale inkha valongesa otyili. Wesukisa vala okulilongesa etyi Ombimbiliya tyili ilongesa konthele yefendelo liotyotyili. Otyo, tyipondola okuelekwa notyitateka tyonombongo mbomatutu mbuhole okumoneka movilongo ovinyingi. Inkha ove upewa otyilinga tyokuimbuka onombongo ombo mbomatutu, ulinga ñgeni? Okuti ñgeno waovola onombongo ambuho mbomatutu opo utale etyi mbukahi? Au. Omunandunge ñgeno wataindya omuvo wokunoñgonoka nawa-nawa onombongo mbotyotyili. Tyina wamanoñgonoka nawa oñgeni onombongo mbotyotyili mbukahi, pahe motyivili okuimbuka onombongo mbomatutu. Tupu, tyina tuamanoñgonoka nawa ongeleya yotyotyili, matutyivili okuimbuka onongeleya mbomatutu.

3. Ngetyi Jesus apopia, oityi tuna yokulinga opo tupandwe na Huku?

 ³ Tyakolela unene tufende Jeova monkhalelo oe ahanda. Ovanthu ovanyingi vasoka okuti onongeleya ambuho mbuhambukiswa Huku. Mahi, Ombimbiliya kailongesa ngotyo. Okupopia vala okuti Ndyimukristau katyituuka. Jesus wati: ‘Haaveho vati ‘Tatekulu, Tatekulu,’ mavakanyingila mouhamba wo keulu. Mamukanyingila vala una ulinga ehando lia Tate ukahi keulu.’ Ngotyo, opo tupandwe na Huku, tuna yokulilongesa etyi Huku ahanda kuonthue, iya atutyilingi. Jesus wapopia vana vahahande okulinga ehando lia Huku okuti, ‘ovalingi vovivi.’ (Mateus 7:21-23) Ngetyi onombongo mbomatutu kambusilivila, tupu nonongeleya mbomatutu mbutupu esilivilo nalike. Mbutuala vala ovanthu kononkhia.

4. Onondaka mba Jesus konthele yonondyila onombali mbulekesa tyi? Opi kese ondyila ituala ovanthu?

⁴ Jeova ukahi nokuavela kese munthu kombanda yo ohi omphitilo opo akamone omuenyo wahapu. Mahi, opo tukamone omuenyo wahapu Mouye omupe, tuna yokufenda Huku monkhalelo yaviuka. Tupu, tuna yokuendesila omuenyo wetu mondyila Huku ahanda. Mahi, ovanthu ovanyingi kavahande okulinga ngotyo. Otyo Jesus apopila okuti: ‘Nyingililei mombundi yahita.” Mokonda ondyila onthanda nokuahandyuka ituala kononkhia, iya ovanyingi omo vekahi nokuendela. Anthi, ondyila onthutu nokuahita ituala komuenyo, iya kavehi vekahi nokuivasa.’ (Mateus 7:13, 14) Ongeleya yotyotyili ituala komuenyo wahapu. Mahi, onongeleya mbomatutu mbutuala kononkhia. Jesus kahande omunthu nawike anyimueko. Otyo Jeova ekahi nokuavela omuvo opo kese munthu elilongese ondaka yae. (2 Pedro 3:9) Ngotyo, onkhalelo omu tufenda Huku ipondola okututuala komuenyo ine okononkhia.

5. Oñgeni matuimbuka vana vaendela mongeleya yotyotyili?

⁵ Oñgeni tupondola okuvasa ‘ondyila ituala komuenyo?’ Jesus wati ongeleya yotyotyili maikaimbukilwa kovituwa  viovanthu vekahimo. Jesus wati: ‘Kovinyango viavo oko mamukaimbukila ovanthu ovo. Omuti omuwa wiima ovinyango oviwa.’ (Mateus 7:16, 17) Otyo, tyilekesa okuti vana vaendela mongeleya yotyotyili, mavaimbukilwa kuetyi vetavela no kovituwa viavo. Ovanthu vongeleya yotyotyili namphila navo ovakuankhali valinga oviponyo, mahi aveho valinga ononkhono mbokulinga ehando lia Huku. Tutalei ovipuka epandu mavitukuatesako okuimbuka vana vaendela mongeleya yotyotyili.

6, 7. Oñgeni ovaumbili va Huku vatala Ombimbiliya? Oñgeni Jesus aava ongeleka ongwa konthele oyo?

⁶ Ovaumbili va Huku valongesa etyi tyikahi mo Mbimbiliya. Ombimbiliya yati: ‘Huku oe watuma okuhoneka Ombimbiliya aiho. Moluotyo, Ombimbiliya ina esilivilo enene pala okulongesa, nokuviyula, nokuviukisa ovipuka, nokulonga nouviuki. Opo omunthu wa Huku akale tyafuapo nawa, nokuapongiyua nawa pala ovilinga aviho oviwa.’ (2 Timóteo 3:16, 17) Paulu wahonekela ovakuatate vae Ovakristau okuti: ‘Etyi muetavela Ondaka ya Huku mueiva kuonthue, onue mueitavela okuti handakako yovanthu.’ (1 Tessalonicenses 2:13) Mahi, tyotyili mueitavela okuti Ondaka ya Huku.’ Moluotyo, efendelo lia vana vaendela mongeleya yotyotyili novituwa viavo, kaviatundile momalusoke ovanthu no moviso viovakuaukulu. Omalongeso avo atunda Mondaka ya Huku Ombimbiliya.

⁷ Jesus Kristu ankho ulongesa etyi tyikahi Mondaka ya Huku. Moluotyo, waava ongeleka ongwa tuesukisa okulandula. Puetyi Jesus elikuambela ku Tate yae keulu, wati: ‘Ondaka yove otyili.’ (João 17:17) Jesus ankho utavela Ondaka ya Huku. Ovipuka aviho alongesa ankho vielikuata kumue no Mbimbiliya. Jesus apeho ankho uti: ‘Tyahonekwa.’ (Mateus 4:4, 7, 10) Iya atumbula onoversikulu mbatyo. Tupu, ovanthu va Huku hono, kavalongesa omalusoke avo muene. Vetavela okuti Ombimbiliya Ondaka ya Huku. Moluotyo, atyiho valongesa tyitunda mo Mbimbiliya.

8. Okufenda Jeova muakutikinya tyi?

 ⁸ Vana vaendela mongeleya yotyotyili, vafenda vala Jeova nokunoñgonokesa enyina liae kovanthu. Jesus wati: ‘Una yokufenda Jeova Huku yove, oe vala una yokuumbila.’ (Mateus 4:10) Ngotyo, ovaumbili va Huku vafenda vala Jeova. Okufenda ngotyo, tyakutikinya okunoñgonokesa enyina lia Huku yotyotyili, novituwa Viae kovanthu. O Salmo 83:18 yati: ‘Ove utiwa Jeova, ove vala Omukulami kombanda yoohi aiho.’ Jesus waava ongeleka konthele yokukuatesako vakuavo okunoñgonoka Huku, ngetyi apopia melikuambelo liae okuti: ‘Ame nanoñgonokesa enyina liove kovanthu wapola mouye, iya ovemphe.’ (João 17:6) Tupu, ovafendeli votyotyili hono, valongesa vakuavo enyina lia Huku, nehando liae, novituwa viae.

9, 10. Oñgeni Ovakristau votyotyili valekesa okuti vehole vakuavo?

⁹ Ovanthu va Huku vena ohole yotyotyili pokati kavo. Jesus wati: ‘Ovanthu mavaimbuka okuti muvalongwa vange, inkha mukala nohole pokati kenyi.’ (João 13:35) Ovakristau votete ankho vali nohole yatyo ngooyo kese umue namukuavo. Ohole yokutundilila kokutavela ovitumino via Huku, itupu okatongotongo, neliyapauko liomihoko no liovilongo. Ohole oyo ipaka kumue ovanthu meongano liovakuatate votyotyili. (Colossenses 3:14) Ovanthu vonongeleya mbomatutu vetupu ohole ngooyo pokati kavo. Oñgeni tuetyinoñgonoka? Ovanthu ovo veliipaa, mokonda yokuelikalaila momihoko, no movilongo no kotyivala. Ovakristau votyotyili kavakuate omauta pala okuipaa ovakuatate vavo Ovakristau, ine ovanthu ovakuavo vali. Ombimbiliya yati: ‘Ovana va Huku novana Veliapu, vaimbukilwa kuetyi: Kese munthu wahalingi etyi tyaviuka, katundile ku Huku, na una uyele mukuavo. . . . Tuna yokukala nohole navakuetu. Tuhalingei nga Kaim watunda Keliapu, waipaa ondenge yae.’—1 João 3:10-12; 4:20, 21.

¹⁰ Okukala nohole yotyotyili muakutikinya ovipuka ovinyingi, hakulityilika vala okuipaa vakuetu. Ovakristau votyotyili, vaundapesa ononkhono mbavo nomuvo wavo, nomalumono avo opo vakuateseko vakuavo, nokuvepameka.  (Hebreus 10:24, 25) Tupu, vavatela vakuavo putyina pamoneka ovitateka, nokulitekula nawa na vakuavo. Ovakristau votyotyili, vaundapesa onondanga mbo Mbimbiliya momuenyo wavo, mbokuati: ‘lingei ovipuka oviwa pala ovanthu aveho’.—Gálatas 6:10.

11. Omokonda yatyi tyakolela okutavela okuti Huku waava Jesus Kristu opo etuyovole?

¹¹ Ovakristau votyotyili, vetavela okuti Huku waava Jesus Kristu opo etuyovole. Ombimbiliya yati: ‘mombuelo yeulu mutupu vali enyina ekuavo, ovanthu vapewa opo tuyovolwe.’ (Atos 4:12) Ngetyi tuelilongesa Mokapitulu 5, Jesus waava omuenyo wae ngo tyilikutila opo ayovole ovanthu. (Mateus 20:28) Tupu, Jesus wanakua na Huku opo akale Ohamba Youhamba wae keulu, pala akatumine pano pohi. Moluotyo, Huku uhanda tutavele ku Jesus, nokuundapesa onondonga mbae, inkha tuhanda okukamona omuenyo wahapu. Otyo, Ombimbiliya ipopila okuti: ‘Una wakolela mo Mona, una omuenyo wahapu. Una uhetavela ko Mona kamakamona omuenyo’.—João 3:36.

12. Okuhalingi onthele youye muakutikinya tyi?

¹² Ovafendeli votyotyili, kavalingi onthele youye. Etyi Jesus ankho ekahi nokumoneswa ononkhumbi nomutumini wo Roma Pilatu, Jesus wati: ‘Ouhamba wange kaulingi onthele youye uno.’ (João 18:36) Ovalanduli va Jesus movilongo aviho, vetavela Kouhamba wa Huku. Moluotyo, kavelipake mo pulitika, no movilwa viouye ou. Mahi, ovafendeli va Jeova kavatyilika vakuavo vahanda okulipaka mo pulitika youye. Tupu, kavevetyilika okuenda komaholovono opo vakakoye omutumini vahanda. Anthi, namphila ovafendeli votyotyili va Huku, kavelipake mo pulitika, vetavela ovitumino viovatumini votyilongo. Omokonda yatyi? Omokonda Ondaka ya Huku ivetuma okuti ‘tavelei kovatumini.’ (Romanos 13:1) Pamue ovatumini vaava ovitumino vielikalela netyi Huku ahanda. Mahi, ovafendeli votyotyili va Huku, valandula ongeleka yo no apostolu, vatile: ‘Onthue tuna yokutavela ku Huku, tyipona kovanthu’.—Atos 5:29; Marcos 12:17.

13. Oñgeni ovalanduli votyotyili va Jesus vatala Ouhamba wa Huku? Moluotyo, vekahi nokulinga tyi?

 ¹³ Ovalongwa votyotyili va Jesus vaivisa okuti Ouhamba wa Huku, oo vala maukamanako ovitateka viovanthu. Jesus wati: ‘Onondaka ombu onongwa Mbouhamba wa Huku, mambukaiviswa kombanda yoohi aiho, konyima opo onthyulilo maiya. (Mateus 24:14) Ovalanduli votyotyili va Jesus Kristu, kavalundu ovanthu okuyumba onthumbi moutumini wovanthu, pala okutetulula ovitateka viavo. Anthi, valongesa okuti  Ouhamba wa Huku keulu, oo vala maukatetulula ovitateka viovanthu. (Salmo 146:3) Jesus wetulongesa tulikuambele okuita ouhamba wafuapo puetyi ati: ‘Ouhamba wove uye. Ehando liove lilingwe pano pohi, ngetyi likahi nokulingwa keulu.’ (Mateus 6:10) Ondaka ya Huku yati Ouhamba oo wo keulu, ‘maukahanyaunako omautumini atyo aeho nokukenyimako. Iya Ouhamba watyo oo, ngao ukakalako apeho’.—Daniel 2:44.

14. Onongeleya patyi ove wii mbulandula ovitumino viefendelo liotyotyili?

¹⁴ Okuhinagela kuetyi tuelilongesa, pahe lipula okuti: ‘Onongeleya patyi mbulongesa tyili etyi tyikahi mo Mbimbiliya? Onongeleya patyi mbupopila ovanthu okuti enyina lia Huku o Jeova? Onongeleya patyi mbulekesa ohole ina Jeova etulongesa? Ombupi mbuna ekolelo mu Jesus, nokuhalingi onthele youye? Onongeleya mbupi mbuivisa okuti Ouhamba wa Huku oo vala maukamanako ovitateka viovanthu? Ponongeleya ambuho kombanda yoohi, oipi ilandula ovitumino ovio?’ Tyotyili, Onombangi mba Jeova ovo vala valinga ngotyo.—Isaias 43:10-12.

15. Tuesukisa okutavela okuti Huku okuekahi. Mahi, oityi vali Huku ahanda?

¹⁵ Okutavela vala okuti kuna Huku, katyituuka pala okuhambukiswa Huku. Ombimbiliya yati alo umue ovilulu ine onoandyu onondingavivi mbutavela okuti kuna Huku. (Tiago 2:19) Mahi, ovilulu ine onoandyu onondingavivi kambulingi ehando lia Huku. Tupu, kaviapandelwe na Huku. Opo tupandwe na Huku, tuna yokutavela okuti Huku okueli, nokulinga ehando liae. Tupu, tuna yokuyekapo onongeleya mbomatutu, atulandula efendelo liotyotyilli.

16. Oityi omunthu esukisa okulinga, konthele yonongeleya mbomatutu?

¹⁶ Apostolu Paulu walekesa okuti katupondola okulinga onthele mefendelo liomatutu. Oe wahoneka okuti: “‘Tundei pokati kavo. Yekeipo okukuata kovipuka viasila. Opo ame  ndyimutambule.” (2 Coríntios 6:17; Isaias 52:11) Moluotyo, Ovakristau votyotyili velityilika kese tyimue tyelikuata nefendelo liomatutu.

17, 18. Ombambilonia Onene otyityi? Omokonda yatyi una yokukanyauka ‘okutundamo’?

¹⁷ Ombimbiliya ilekesa okuti onongeleya ambuho mbomatutu, mbulinga onthele yo ‘Mbambilonia Onene.’ a (Revelação [Apocalipse] 17:5) Enyina olio, lituhinangelesa epundaumbo lio kohale lio Mbambilonia. Mepundaumbo olio, omo muahimbikila onongeleya mbomatutu, konyima Yombila Onene kononthiki mba Noe. Omalongeso omanyingi ekahi nokulongeswa hono monongeleya mbomatutu, atuka mo Mbambilonia yo kohale. Ovanthu ko Mbambilonia ankho vafenda huku wike mu vetatu. Hono, monongeleya ononyingi, valongesa okuti huku wike mu vetatu. Mahi, Ombimbiliya ilongesa nokuayandyuluka okuti kuna vala Huku yotyotyili wike, Jeova. Jesus Kristu, Omona wa Jeova. (João 17:3) Mo Mbambilonia kohale ankho vetavela okuti ovanthu vena ohande yahankhi. Vati ohande ihupa putyina omunthu ankhia. Tupu, vati ohande ipondola okukamona ononkhumbi motupia. Hono, onongeleya ononyingi, mbulongesa okuti omunthu una ohande yahankhi, ipondola okukamona ononkhumbi mo pulukatoliu ine omo ifelunu yotupia.

¹⁸ Omalongeso Ombambilonia eliayandyana mouye auho. Moluotyo, eongano lionongeleya ambuho mbomatutu hono, liatokala nawa okuihanwa okuti Ombambilonia Onene. Huku wati onthyulilo Yeongano lionongeleya mbomatutu, maiya otyiuhulukila. (Revelação [Apocalipse] 18:8) Okuti wetyimona omokonda yatyi una yokukanyauka okutunda mongeleya ilinga onthele Mombambilonia Onene? Jeova Huku uhanda ove ‘utundemo’ liwa-liwa putyina nkhele pena omuvo.—Revelação [Apocalipse] 18:4.

19. Mokonda yokuumbila Jeova, oityi mokamona?

 ¹⁹ Putyina wamatokola okutunda mongeleya yomatutu, omapanga ove ine ombunga, mavekuyale. Mahi, okuumbila Jeova kumue novanthu vae, mokakala vali nomapanga omanyingi unene, tyipona vana wasapo. Ovalongwa votete va Jesus vasilepo ovipuka ovikuavo opo valandule Jesus. Noove inkha ulinga ngotyo, mokakala novakuatate no nomphange ovanyingi vopaspilitu. Mokala pokati kombunga onene yo Vakristau votyotyili, vokuna ohole yotyotyili navakuavo. Tupu, mokala nekevelelo lihuvisa liomuenyo wahapu, ‘mouye omupe’. (Marcos 10:28-30) Pamue, mokueenda kuononthiki alo umue vana vekuyalele mokonda yokulilongesa Ombimbiliya, mavaimbuka okuti etyi ukahi nokulilongesa otyili. Moluotyo, navo vapondola okukala ovafendeli va Jeova.

20. Vana vaendela mongeleya yotyotyili, vena ekevelelo patyi komutue?

²⁰ Ombimbiliya ilongesa okuti kuakamba katutu, pala Huku anyimeko ouye ou wovivi, opo apingiyapo ouye omupe wouviuki, maukatuminwa Nouhamba wae. (2 Pedro 3:9, 13) Maukakala ouye uhuvisa unene! Mouye omupe wouviuki, mamukakala vala ongeleya ike, yefendelo liotyotyili. Moluotyo, hatyiwa okulipaka kumue novafendeli votyotyili pahetyino?