ONONDAKA sheʼohlʹ mo Hebreu, no haiʹdes mo Gregu, mbumoneka ovikando 70 mo Mbimbiliya. Onondaka ombo mbupopia konthele yononkhia. Ono Mbimbiliya mbumue mbupitiya onondaka ombo okuti, ‘elangalo’ ‘oifelunu’ ine ‘etoto’. Mahi, omalaka omanyingi etupu onondaka mbuhangununa nawa onondaka sheʼohl no haiʹdes. Ombimbiliya Tradução do Novo Mundo, yuundapesa onondaka “Seol” no “Hades.” Mahi, onondaka ombo oityi tyili mbuhangununa? Tutalei oñgeni mbaundapeswa mono testu mbumue mbo Mbimbiliya.

Eclesiastes 9:10 yati: ‘Mo Seol muna moende mutupu ovilinga, nokusoka, nenoñgonoko, nonondunge.’ Okuti o Seol etoto muna mupakwa kese munthu wankhia? Au, hatyoko. Tyina Ombimbiliya ipopia konthele yelangalo muna mupakwa omunthu wankhia, kaiyundapesa onondaka sheʼohlʹ no haiʹdes. (Gênesis 23:7-9; Mateus 28:1) Tupu, Ombimbiliya kaiyundapesa ondaka “Seol” tyina ipopia etoto lina mupakwa ovanthu ovanyingi vankhia, ine pamue elangalo liombunga.—Gênesis 49:30, 31.

Muaina, oityi tyitiwa o “Seol”? Ondaka ya Huku ilekesa okuti o “Seol no “Hades”, otyipuka tyimue tyipona vali etoto muna mupakwa ovanthu vankhia. Ngo ngeleka, Isaías 5:14, ipopia okuti o ‘Seol ina ehando enene, yaikula unene omulungu wayo.’ Namphila o Seol yanyinale ovanthu ovanyingi, mahi, nkhele kayatuukile, ihanda vali. (Provérbios 30:15, 16) Kese etoto liheyua opo mupakwe ovanthu vankhia liyula, “mahi, o Seol kaiyula.” (Provérbios 27:20) Kutupu onthiki imue o Seol maikeyula. Itupu apa yaoyela. Otyo, tyilekesa okuti o Seol ine o Hades, hamphangu imoneka. Anthi, okokalunga ine okondyembo kuna kuaya ovanthu aveho vokuankhia.

Etyi Ombimbiliya ilongesa konthele yetutilo, tyitukuatesako okunoñgonoka vali nawa oityi o “Seol” no “Hades”. Ondaka ya Huku ilongesa okuti ovanthu vekahi mo Seol no Hades ovovana vokuankhia vokuna ekevelelo lietutilo. a (Jó 14:13; Atos  2:31; Revelação [Apocalipse] 20:13) Tupu, Ombimbiliya ilekesa okuti ko Seol ine oko Hades kakuaile vala vana ankho vaumbila Jeova. Mahi, tupu kuaya ovanthu ovanyingi vahaumbilile Jeova. (Gênesis 37:35; Salmo 55:15) Mahi, Ombimbiliya ipopia okuti, ‘makukakala etutilo liovaviuki na vana vehevaviuki’.—Atos 24:15.